Seguru? Auzo seguruen alde lelopean, Trintxerpe eta Donostiako Alderdi Eder lotu ditu gaur goizean SOS Arrazakeria Gipuzkoak, Medicus Mundi Gipuzkoak eta CODE elkarteek deitutako XXVIII. Arrazakeriaren Kontrako Martxak. 11:30ean hasi da mobilizazio ibiltaria Trintxerpeko alkateordetzaren paretik, era Donostiarako bidea hartu, eta 13:00ak inguruan iritsi dira Alderdi Ederrera.

Mobilizazioaren helburua izan da “gure auzoetan errespetua, elkartasuna eta berdintasuna eskatzea”, deitzaileen arabera: “Diskriminazioak eta arrazakeriak ez dute lekurik hemen, eta guztiok lagun dezakegu guztiontzako ingurune seguruagoa eta bidezkoagoa sortzen”. Hala, martxaren bukaeran egindako interbentzioan salatu dute delinkuentzia txikiak “gure frustrazioen eta segurtasun ezaren edalontzia betetzen” duela, “eta hori konpon dezaketela uste dutenak bultzatzen ditu, baita kaputxa eta burdinazko barra eskuan hartuta ere”, Trintxerpen izandako erasoak gogora ekarriz: “Ez dugu gorrotoa nagusitzen den auzorik nahi, non pertsona batzuen jatorriagatik kolektibo osoak kriminalizatzen diren”.

Aldi berean, auzo seguruak aldarrikatu dituzte, “justuak, solidarioak eta duinak pertsona guztientzat”. Segurtasuna ezin dela arrazakeriarako aitzakia izan esan dute, “ezta zailtasun gehien dituztenei bidegabeki seinalatzeko ere. Konponbidea ez da gorroto gehiago, baizik eta eskubide gehiago”.

Jarraian, martxaren irteerako bideoa. Argazki sorta ikusteko, sakatu hemen.