Nor dago G7 Blokaturen atzean?

Pertsonaz osatutako kolektiboa gara, hau da, ez dago inongo eragile zehatzik atzean. Desobedientziaren esparruan lan egiten duten kolektiboekin G7 goi bilera eta bere mundua oztopatzea dugu xede. Honekin esan nahi dugu ez dugula soilik goi-bilera jarriko jomugan, setio egoera aurreikusten dugu gainera, eta adibide batzuk jartzearren, prest gaude Ipar Euskal Herriko McDonalds jatetxeak edo Biarritzeko Golfa okupatzeko.

Nola ikusten duzue goi bilera?

G7aren antolatzaileak kontrako diskurtsoak bereganatzen saiatzen ari dira. Diotenez, desoreka sozialei aurre egin nahi diete, gizartearen parte-hartzea sustatu nahi dute politikan... propaganda merkea. Aldi berean, aurka dauden eragileen artean zatiketa eragiten saiatzen ari dira, protesta batzuk legitimatzen eta beste batzuk kriminalizatzen, argi ikusten da. Black block-en mehatxua haizatzen ari dira beren hedabideetan egunero, jendea beldurtu asmoz. Baionako alkateak, adibidez, merkatariei eskatu die goi bilerak iraun bitartean dendak itxita mantentzeko, gauza arraroak ikusten badituzte Poliziari deitzeko... psikosi efektua sortzen ari dira.

Eta horren aurrean zer?

Urtebeteko lana izan da G7 EZ plataformarena. Momentu indartsuan gaude eta antolakuntza prest da. G7 Blokatu plataformatik desobedientzia aktiboaren deia egiten dugu, dagoeneko indarrean diren desobedientzia dinamikei dei egiten diegu, egun horietan denon artean politikoki eta praktikoki isolatzeko goi bilera.

Zein dira zuen erreferentzia politikoak?

Erreferentzia asko ditugu. Euskal Herrian: atxiloketen aurkako herri harresiak, borroka sozialak bateratzeko Bizitza Da Handiena dinamika, Errekaleor auzo autogestionatua, Itoizko solidarioak, Intsumisioaren borroka... eta nazioartetik: justizia klimatikoaren aldeko Ende Gelände eta Extintion Rebellion, Hong Kongeko guardasolak, Frantziako Estatuan biribilkiak okupatzen dituzten Jaka Horiak, Kataluniako CDRak, ZAD... Erdibide bat ireki nahi dugu pazifismo dogmatikoaren eta intsurrekzioaren sakralizazioaren artean.

Zein da zuen helburu politikoa Euskal Herriari dagokionez?

Pixkanaka konfrontazioaren maila igo egin behar dela uste dugu. Jende asko dago Euskal Herri osoan ekimenen zain. Horretarako, egoera honetan onargarriak izango diren planteamenduak egin behar ditugu. Gure armak gure gorputzak izango dira. Eseriko gara, etzan, besoak elkarri soldatu... hiru egunez ahalik eta ekimen gehien blokatzen eta lurraldea okupatzen saiatuko gara. Erresistentziaren eta alternatiben bateratzea lortu nahi dugu, aurrekaria izatea Miarritzekoa Euskal Herriko militantziarentzat fase politiko berri honetan. Argi dugu guk ez dugula bortizkeria erabiliko, ekintzak festa giroan egin nahi ditugu, elkar zainduz, baina ekimenak determinazio handiarekin. Planto egingo dugu.

Setio egoera aurreikusten dugu, bizi garen eremutik kanpo nahi gaituzte, eta ez diegu utziko hori lortzen. Gobernuak itxaroten gaitu zintzoen oposizioa bagina bezala eta Black Block-i egurra eman nahi diote. Guk erdibidea planteatzen dugu, ez gaitezen izan gu zatituak, beren muntaia guztia salatu nahi dugu.

Eta nola kokatzen da hau G7 EZ plataformarekin?

Guk bat egiten dugu plataformak landu dituen printzipioekin. Osagarri gara. Euskal Herriko kolektiboei dei egiten diegu, pentsa dezatela zer egingo luketen gustura egun horietan eta denon artean, egin egingo dugu.