Mefsst! Musika errebolta feminista

NOIZ: Otsailaren 24an

NON: Zarauzko Hiruputzu gaztetxean

--------------------------------------------------------

Ainara Legardonen hitzaldiarekin hasi da Mefsst! jaialdiaren bigarren eguna Zarauzko Hiruputzu gaztetxean, adimen artifizialak kulturaren eta musikaren sektorean duen eraginaz hausnartzeko espazio intimo bat sortuta. Egia aitortzera, barre txikia atera zait Ainarak gordin azaldutako Capitalismo de la Vigilancia adieraren euskarazko ordainaren bila Elhuyarrera jo dudanean. Zaintzaren kapitalismoa, toma esa.

Baina oximoronak oximoron, MJ Lisaminak eman dio segida, solasaldiak eragindako hotzikarei epela emanez. Eta munstroaren aurrean paralizatuta geratu ordez, mugikorrak utzi eta kide feministaz inguratuta dantzatzeko gonbita egin digute Zetkin taldekoek ere. Martxak areagotuta, ahizpatasuna eta sua ekartzera heldu dira Baionatik. Punkaren formulari –abiadura, distortsioak eta mezu zuzenak– feminismoa injektatzeko proposamena da boskotearena, lehenengo abestitik azkeneraino soinu-bandadun manifestu bat osatzen duena. ¿Quién te dijo que iba salir con miedo a rugir? ohartarazita, ekin orduko konektatu dute publikoarekin. Abesti propioen indarra gutxi ez, eta bertsio pare bat tartekatu dituzte, tenorea mantenduta sua hauspotu dutenak: Zorra eta Lola.

Euskal Herriko punk feministaren legatuaren aitortza ederra iruditu zait, legatu horren ezinbesteko espazio den jaialdi batean egiteak daukan esangurarekin, gainera. Porrusalda eta martxeak osagai dituen ahizpatasuna eta kea, aurretik bidea ireki ziguten intensa horiei lekukoa hartuta datorren marruma baionarraren eskutik.

Itzek talde mungiarra izan da gauaren segidaren arduradun, eta herrikide dituzten taldeen influentzia nabaria da hirukote hasiberrian. Abesti bakarra dute grabatuta, baina zerrenda ederra aurkeztu dute. Abestiei neurria hartuta, zuzenekoei neurri hartzen ari den taldea; Mungiatik Euskal Herrira zabaltzen ari den musikaren basoko basa-lore ernatu berri bat, ongarririk falta ez zaiona. Eta ilunpean, jada epeletan, ahal eta nahi zuenak jarraitzeko aukera eman zigun DJ Eromenak, Mefsst!-en edizio honi amaiera emateko.

Musika errebolta feministaren soinu-banda eta osagai dira basa-lore ernatu berriak, intensak, zorrak eta Lolak. Baina baita haientzat porrusalda eta soinu-ekipoa mimoz prestatzen dituztenak ere. Sua piztea ez baita nahikoa, iraun dezan zaintzea behar du; martxea betikoena izan ez dadin izerdia, hitzak eta gorputzak jartzea.