ARGIA.eus

2021eko maiatzaren 06a

Plataforma per la llenguak poliziaren hizkuntz diskriminazioak salatu ditu

  • Katalunian, azken gertaerak hautsak harrotu ditu, beste behin. Abenduaren 9an, gaztelaniaz ondo moldatzen ez den jatorri belgikarreko katalan hiztunari poliziak gaztelaniaz egiteko exijitu zion Bartzelonako aireportuan. Poliziak bi salaketa jarri zizkion ordena publikoa aztoratzeagatik eta poliziaren esanei ez jarraitzeagatik.

ARGIA @argia
2019ko abenduaren 30a
Kris C. eskubide urraketa jasan duen katalan hiztuna erdian, Plataforma per la llenguako kideekin. Argazkia Plataformarena da.

Plataforma per la llengua gobernuz kanpoko erakundeak Kris C. katalan hiztunari salaketa jartzen lagundu dio. Jatorri belgikarreko herritarrak Bartzelonako aireportuan jaso zuen tratua iraingarria eta umiliagarria izan zen.

Koloneko minbizia izan duenez, urdailera lotuta poltsa erabiltzen du eta segurtasun gunea pasatzerakoan segurtasun zaintzaileak zer zeraman galdetu zion. Kris C.-k katalanez azaldu zion zer zen eta zaintzaileak ironiaz erantzun zion, katalanez egin ziolako. Gaztelaniaz egiteko eskatu zion. Gizonak azaldu zion Belgikan jaioa zela eta holandesa, ingelesa, frantsesa, alemana eta katalana hitz egin zitzakeela, baina gaztelaniaz ez zela ondo moldatzen.

Zaintzaileak gertu zituen guardia zibil pareari deitu zion. Poliziek, modu onean, esan zioten haiek ere ez zutela katalanez egiten, eta gaztelaniaz egitea exijitu zioten. Poltsa erakusteko eskatu zioten behin eta berriz, eta azkenean, katalanak galtzak jaitsi zituen. Poltsa erakusteko galtzak jaitsi beharra zuen. Guardia zibilak haserretu eta gela batera eraman zuten. Han lehenengo salaketa jarri zioten ordena publikoa aztoratzeagatik.

Bidaia zakua arakatu zioten eta non bizi zen galdetu zioten. Esandakoa gaizki ulertu eta gaizki idazten ari zirela konturatuta katalanak zuzenketa egin zien. Bigarren salaketa jarri zioten poliziei haien lanean ez laguntzeagatik.

Kaltetuak ezin izan zuen bidaia egin. Hegazkinean sartu zen, baina handik atera zuten poliziak bidaiatzeko baimena kendu ziola argudiatuta.

Plataforma per la llenguak salatu duenez, gertakari honetan ez zioten azaldu zein ziren bere oinarrizko eskubideak edo ez zioten abokatua izateko aukerarik eman. Ez zuten katalanez hitz egin eta berarekin ulertzeko modua egingo zuen inor ekarri. Katalanez ez artatzeak legea hausten du, langile publikoak derrigortuta baitaude herritarrak eskatutako hizkuntzan aritzera.

Plataforma per la llenguak kaltetuari laguntza legala eskainiko dio bere hizkuntza eskubideak defenda ditzan. Erakundeko zuzendari Neus Mestresek eskatu du poliziek haien protokoloa bete dezatela eta zigor ditzala hala egiten ez duten langileak.

 

 

Zigortuak %3 dira

2007tik, guardia zibilak eta polizia nazionalak egindako 68 diskriminazio linguistiko dokumentatuta ditu Plataforma per la llenguak. Diskriminazio kasu guztietan herritarra xaxatu dute eta %15ak eraso fisikoa jasan du. Kasu gehienek ez dute ondorio legal edo judizialik eta polizien %3ak baino ez du zigorra jaso.

 

Bost eskaera Espainiako Gobernuaren ordezkaritzari

Teresa Cunillera Espainiako Gobernuaren ordezkariari bost gauza eskatu dizkiote:

-Konstituzioa aldatu eta katalana estatuko hizkuntza ofizial egitea.

-Lor dezala Katalunian Estatuaren lan publikorako iragarpenak egiten direnean katalana ere jakin behar dela ziurtatzea.

-Konpromisoa har dezala segurtasun indarren inpunitatea buka dadin.

-Hizkuntza eskubideei buruzko kartelak ezartzea estatuaren administrazio publikoaren egoitzetan, batez ere polizia etxeetan.

-Fernando Grande-Marlaska Espainiako Gobernuko Barne ministroarekin bilera eskatzea hizkuntza diskriminazioaz hitz egiteko.

 

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal honetan artxibatua: Katalana

Katalana kanaletik interesatuko zaizu...

Azkenak EGILEA
Argia buletina
Egunaren laburpena
zure e-postan
Eguneraketa berriak daude