ARGIA.eus

2021eko azaroaren 30a

Nazioarteko presioak eragina izan du Namibiako elefanteen salmentaren "porrotean"

  • Joan den urtearen amaieran iragarri zuen Namibiako Gobernuak 170 elefante enkantean jarriko zituela. Animalien eskubideen aldeko taldeen gaitzespen orokorra eragin zuen eta 100.000 pertsonak baino gehiagok sinatu dute ekimenaren aurka. Gobernuko funtzionarioak onartu dutenez, presioaren eraginez, 57 elefante "bakarrik" saltzea lortu dute.

Axier Lopez @axierL
2021eko abuztuaren 27a

Namibiako Gobernuak sustatutako elefanteen salmenta oso kritika gogorrak jaso zituen enkantea iragarri zuen unetik. Nazioarteko kritika horien eraginez salmenten herena baino ez da gauzatu, Ips atariak jaso duenez.

Namibiako Gobernuaren iritziz, lehorteak basa-espezie batzuen eta gizakien arteko gatazkak areagotzen ari dira eta horri aurre egiteko, elefanteak haien lurretatik atera eta diru gehien jartzen duenari saltzea bururatu zaie Namibiako funtzionarioei. Animalien babeserako hainbat taldek galzorian dauden espezieen salmenta kritikatu dute azken urteotan. Baina Namibiako enkanteak porrot egin badu ere –57 elefante "soilik" saltu zituzten–, gobernuak ez du baztertu etorkizunean beste salmenta bat egitea.

Agintariek esan dutenez, saldutako elefanteak harrapatu eta haien habitatik aterako dituzte. Saldutako elefanteen artean, 42 nazioartera esportatuko dituztela adierazi dute –helmuga zehaztu gabe– eta gainerako hamabostak Namibian geratuko omen dira,  xehetasun gehiagorik eman ez badute ere.

"Nora doaz saldutako animalia hauek?", galdetu du enkantearekin kritiko agertu den Keith Lindsay biologoak. "Ez dakigu. Ez dago xehetasunik. Ez da gardentasunik izan. Gainera, nondik aterako dira elefante horiek? Eremu batzuetatik hartzen badituzte, elefanteen populazioan inpaktua larria izan daiteke".

Namibiako Gobernuaren arabera, elefanteen populazioak gora egin du azken hamarkadetan, 1995ean 7.500 ziren eta 2019an 24.000. Hala ere, ez dira iritzi berekoak animalien babeserako taldeak. Biztanleriaren benetako tamaina, gobernuak dioena baino askoz txikiagoa dela iradoki dute, 6.000 inguru.

National Park Rescue, Afrika natura parkeak ez ixteko lan egiten duen gobernuz kanpoko erakundeko kide Mark Hileyk ondorengoa adierazi dio IPS hedabideari: "Komunitateei mesede egiteko aitzakiarekin, erreserben kopurua puzten ari dira politikari afrikarrak, beren ondare naturala saldu eta dirua ateratzen ari dira atzerriko potentzia immoralei esker. Baina horrelako jarreren aurka Twitterren idatzitako milioika txio amorratu horiek egiazko konpentsazio garrantzitsu bihurtu arte, haien suntsipena saihestezina izango da".

Hileyren arabera, "Afrikako azken elefanteen egoera ez da oso bestelakoa Brasilgo azken oihan tropikalen egoerarekin alderatuta; pobretutako nazioek beti ustiatuko dute munduko aktibo partekatua beren mugen barruan, munduak haiek babesteagatik ordaina eman arte".

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Animalien eskubideak  |  Namibia

Animalien eskubideak kanaletik interesatuko zaizu...
2021-10-15 | Leire Artola Arin
Portugalen debekatuta izango dute zezenketetara joatea 16 urtetik beherakoek

Ostegunean onartu du Ministroen Kontseiluak lege-dekretua. Hori zen PAN alderdi animalistak jarritako baldintza aurrekontuak onartzeko.


2021-09-03 | Axier Lopez
22 ehiza dorre eta postu suntsitu ditu Animalien Askapen Fronteak

Ehizarako hamabost dorre eta zazpi posturi eraso egin diete Jaizkibel, Jarindo, Kastañarri, Gorbeia, Arrikurutz eta Kintoa mendietan. Euskal Herriko Animalien Askapen Fronteak hartu ditu bere gain animalien "egoera tamalgarria" eta "ehiztarien... [+]


Zezenketak debekatu dituzte Gijonen, toreatutako bi animaliari ‘Feminista’ eta ‘Nigeriano’ izenak jarri ondoren

Ana González hiriko alkateak salatu du “giza eskubideen aurkako ideologia bat hedatzeko” erabili dituztela zezenketak. Horregatik, Udalak ez du berrituko plaza erabiltzeko emandako kontzesioa. Tauromakiaren inguruko elkarteek azaldu dute Feminista eta... [+]


Animalien sufrimenduari buruzko erakusketa suntsitu dietela salatu du Aska Itzank Animaliak taldeak

Linas Kortaren argazkiak tokitik kendu eta ibaira bota edo desagerrarazi dituzte. Animalien sufrimendua azaleratzen du erakusketak.


Irakurrienak
Azken albisteak
Argia buletina
Egunaren laburpena
zure e-postan
Eguneraketa berriak daude