Hego Koreako multinazionalak presionatu izana leporatu diote Park Geun-hyeri, bere gertuko enpresari baten konpainietan diru kopuru handia sar zezaten. Eskandaluak Hego Koreako enpresa talde nagusia zipriztindu du: Samsung. Enpresaren oinordekoa atxilotu dute, eroskeria eta diru publikoaren erabilera bidegabea leporatuta.

Auzitegiaren erabakiak askotariko erantzunak eragin ditu. Presidentearen aurkakoek pozez hartu dute berria, baina haren aldekoak kalera atera dira, kargugabetzearen aurka protesta egitera. Poliziaren eta manifestarien artean liskar gogorrak egon dira eta bi pertsona hil egin dira.

Park 2012an heldu zen presidentziara, programa kontserbadore batekin eta Ipar Korearen aurka gogor aritzeko promesarekin. Hego Koreako lehen emakume presidentea izan zen. Oso emaitza onak izan zituen hautestontzietan, baina haren ospe onak behera egin zuen eta iazko azaroan ehunka pertsonak kargugabetzea eskatu zuten. Azkenean, Asanblada Nazionalak kargutik kentzeko proposamena egin zuen eta tribunalek onartu dute. Gaitasungabetzeak immunitatea kenduko dio eta, ondorioz, epaitu ahal izango dute.

Hurrengo presidenteak arazo geopolitikoei aurre egin beharko die

Kargugabetzearen berrespena eta hauteskundeen deialdia garai nahasietan heldu dira. AEBak eta Hego Korea misilen aurkako sistema bat hedatzen hasi dira (THAAD izenekoa) Ipar Koreari aurre egiteko, eta erabakiak Txinaren haserrea eragin du. Aldi berean, Ipar Koreak bere armamentu programarekin jarraitzen du eta aste honetan lau misil jaurti ditu Japoniako itsasora. Hauteskundeak irabazten dituen alderdiak egoera hori kudeatu beharko du.  

Oraindik ez da zehaztu hauteskundeen data, baina datozen hilabeteetan izango dira eta oposizioaren alderdi nagusia, Koreako Alderdi Demokratikoa, da gogokoena herritarren artean.