“Tristea da, une honengatik agonia sentitu dut azken hamabost urteotan”, onartu du. “Duela gutxi, eta nire familiari eta lagunei esker, publikoki eta harro esan ahal izan dut gay naizela. NFL ligari, nire entrenatzaileei eta taldekideei euren babesa eskertzen diet”.

Gizonezkoen kirol munduan hain ezohikoa den pausoa eman du Nassibek, armairutik ateratzeak kirolariak idolotzat dituzten haur eta gazteei lagungarri gerta dakiekeelakoan. Berria eman eta gutxira, “zutaz harro gaude” erantzun dio Raiders taldeak Twitterren. Jaso dituen babes mezuak ere ugariak izan dira.

Gay, lesbiana, bisexual, transgenero edo queer diren gazteen artean suizidioa saihesteko lan egiten duen The Trevor Project ekimenari 100.000 dolar eman dizkiola ere iragarri du mezuan.

“Ez dago futbolari gayrik, horregatik ez dira armairutik ateratzen”

Sexu joera aniztasunak gizarteko hainbat esparrutan lortu duen ikusgarritasunak talka egiten du guztiz kirol munduan gaiak duen tabu kutsuarekin, zer esanik ez gurean kirol errege den futbol munduan. Joaquín Caparrós Athleticeko entrenatzaile ohiak garbi esan zuen, duela hamarkada bat: “Ez dago futbolari gayrik Espainian, horregatik ez dira armairutik ateratzen”. Kontua da, tamalez panorama ikusita haurrek txikitatik jaso dezaketen mezua hori bera dela, gizonen futbolean ez dagoela edo ez dela onartzen homosexualik.

Beren sexualitatea natural eta askatasunez bizitzeko jokalariek dituzten traba eta presioez idatzi genuen ARGIAn.