Orain arte askapen prozesuan EPPK-ren funtzio nagusia erresistentzia izan dela eta ziklo politiko berrian beren funtzio berria finkatu behar dutela diote.

Aurreko prozesuetan izandako eskarmentuagatik, idazki politikoak berenganatzeko zailtasunak izango dituztela jakitun direla diote, eta "espekulazio eta manipulazioa helburu duten jokabideak" egon daitezkeela eta, presoen eskubideen alde daudenei begirunea eta laguntza eskatu diete.

Euskal Herria, Espainia, Frantzia, Portugal eta Suitzan daude ariketa politikoan parte hartuko duten kideak. Hala ere, kolektiboa uztea erabaki zutenei eztabaidan parte hartzeko aukera eman nahi izan diete. ETAk borroka armatua bertan behera utzi osteko bost urteotan kartzeletan bizi izandako egoerari buruzko azterketa hartuko dute oinarri eta aurrera begira eman beharreko urratsak eztabaidatuko dituzte.

"Abian prozesuaz geroztik, Ezker abertzaleko antolakunde bakoitzak bere eztabaida prozesua antolatu du. EPPK-k badu berezitasunik ordea, gure elkartea ez baita bere horretan antolakunde politiko berezia, eta bai Euskal Herriaren askatasun borrokaren aurkako errepresioak osatutako taldea, antolakunde desberdinetako kide edota herritar soilak biltzen dituena. Beraz, bi berezitasun horiek oso kontuan izango ditugu hausnarketa-prozesu honi heltzerakoan: etsaiak bahituta gauzka eta Kolektibo anitza osatzen dugu".