Atxilotu zuten unetik orain artekoaz mintzatu da Torrealdai mahai inguruan, “Prozesu guztia izan da tortura: fisikoa eta psikologikoa. Eta horren guztiaren ondorioak orain ari naiz pairatzen”. Horrekin lotu du jakinarazi berri duen gaixotasuna: “Ez naiz sendagilea eta ez dut frogarik aurkeztuko. Nire minbiziak erroak non dituen, ordea, nik garbi dut, eta nire psikiatrak ere bai”.

Maddi Ane Txoperena kazetariak Berrian jaso duenez, izua hezur-muineraino sartu ziotela idatzi zuen Torrealdaik espetxetik atera ostean. Torturaren inguruko jardunaldietan azaldu du hori Egunkaria-ko Administrazio Kontseiluko lehendakari ohiak: “Orain jakin dut ez nintzela figura literario batez ari, neuk jakin gabe, nire gaitzaren deskribapenaz baizik. Bai, minbizia dut, non eta hezur-muinean. Barrurago ezin. Zuen aurrean egin nahi dut publiko. Bistan da zergatik: deskribatu dudan torturari lotzen diot gaitza, nire minbizia”.