‘La Manada’ auziko bortxatzaileak ondorengo orduetan geratuko dira baldintzapean aske, Nafarroako Auzitegiak ezarritako 6.000 euroko fidantza ordaindu ostean. Agustin Becerra akusatuen abokatuak adierazi du dagoeneko badaukatela fidantza, beraz berandu barik kalera aterako direla aurreikusten da. Dagoeneko Iruñeko espetxearen kanpoaldean jendea bilduta dago, bertan baitaude akusatuetako hiru.

Herri-akusazio gisa, Nafarroako Gobernuak eta Iruñeko Udalak ‘La Manada’ baldintzapean aske utzi duen autoari helegitea jarriko diote. Fiskaltzak ere asmo berbera agertu du.

Garbiñe Biurrun EAEko Auzitegi Nagusiko Sozial Saileko buruak ohartarazi du arrakala ari dela sortzen jendartearen eta justiziaren artean, eta azalpen ugari behar direla epaimahaiaren erabakiak koherenteak direla ulertzeko. Aipatu du ez duela ulertzen orain arte mahaigainean izandako akusatuen “ihes egiteko arriskua” kontuan ez hartzea. Epaimahaiak “zer aldatu den” azaltzea faltan somatu duela esan du.

Nafarroako Gobernua “suminduta” azaldu da epaimahaiaren erabakiarekin. Ana Ollo Hualdek, Nafarroako Gobernuko Herritarrekiko eta Erakundeekiko Harremanetako kontseilariak, erabaki hau ezin dutela defendatu esan du, Nafarroako Gobernuak hasieratik ulertu duelako sexu erasoa izan dela. Legedian aldaketak egitea defendatu du, legeak ez dezan areagotu jendartearen eta justiziaren arteko arrakala. Autoa jakitera ematearen modua ere kritikatu du kontseilariak, erasotutako emakumea kontuan hartu ez delak, “berbiktimizazioa” eraginez. Izan ere, emakumeak ezer jakin aurretik izan zuten erabakiaren berri bost akusatuek.

Joseba Asiron alkateak erabakiak “sakoneko atsekabea” eragiten diola adierazi du. Udalak erasotua izan den emakumearekin egoteko nahia duela azaldu du, eta “kasu honekin amaierara arte joango direla” berretsi. Sanferminen atarietan egonik, Asironek hiria jendarte osoarentzat ziurra izatea nahi duela adierazi du. Bere “ardura nagusia” Iruñea emakumezkoei beldurrik gabe eta naturaltasun osoz ibili, ondo pasa eta bizitzea ahalbidetzen dien hiria izatea dela esan du.

Emakunde, Emakumearen Euskal Erakundea, arduratuta azaldu da epaimahaiak jendarteari igorritako mezuarekin, eta babesa eta elkartasuna helarazi dio emakume erasotuari.