Santiago Abascal Vox alderdiko presidentearen amak eta arrebak salatu dute Amurrion (Araba) duten arropa dendan pintaketak egin dizkietela eta harriak jaurti dizkietela. 

Abascalek sare sozialen bidez zabaldu du salaketa, dendako irudiak erantsiz. Horietan ikusten denez: "Ea hau gustuko duzun, faxista" esaldia idatzi dute eskuin muturreko alderdiko buruzagiaren familiaren dendan.

EAJk eta EH Bilduk ekintza gaitzetsi dute

EAJk publikoki gaitzetsi eta salatu du erasoa eta "elkartasuna adierazi die erasoetan mehatxatu dituzten pertsonei". Alderdi jeltzaleak "elkarrizketarako konpromisoa" berretsi du, "tresna eraginkorrena den aldetik, desberdinarekiko errespetuarekin, bizikidetzarekin eta bakearekin eta askatasunarekin".

EH Bilduren udal taldeak ere gertatutakoa salatu du sare sozialaren bidez. "Onartezina" dela esan du "udalerriko familia batek bart bere dendan jaso zuen erasoa".

Ordu batzuk geroago, Voxeko buruzagiak erantzun du, esanez eskertzen dituela bere familiaren negozioaren aurkako erasoaren aurrean erakutsitako "elkartasun adierazpenak", baina oraindik bereizten dituela adierazpen horien artean zein diren zintzoak eta zein aldiz bere familia "deabrutzen" aritu direnek "postureo" gisa egindakoak.

PSE-EE eta PPren adierazpenak

PSE-EEko Idoia Mendiak ere gaitzetsi ditu pintaketak. Alderdi politikoen egoitzen eta denda partikularren aurkako erasoak "intolerantzia erakustaldia dira" EAEko lehendakariordearen ustez.

Carlos Iturgaiz EAEko PPko presidenteak, bere aldetik, "eraso nazkagarri eta koldar hau gaitzesten" duela adierazi du sare sozialetan. "Nire babes osoa Santiri eta bere familiari. Denok ezagutzen ditugu lur honetan animalia fundamentalista fanatiko eta kaputxadun horiek, nondik datozen eta nortzuk diren ", adierazi du.