Izan ere, hainbat arrazoirengatik dauka garrantzia Lampedusak gaur egun. Batetik, bidaian parte hartuko dutenek nabarmendu dutenez, “turismo garestiaren gune seinalatua” da, “aberatsek beren erreserba egin dute”. Gainera, azken urteotan migrazioarekin lotutako tragediengatik egin da ezagun. “Bizirik iritsi direnen kontzentrazio eremua” dela salatu dute Mikelazuloko kideek.

Azkenik, uhartea militarizatuta dagoela ere seinalatu dute: NATOk, Frontex-ek eta Italiako armadak “gerrarako atonduriko leku estrategikoa” bihurtu dute.

“Europako lotsagabekeriaren sinboloa da”, azaldu dute Harresirik Gabe egitasmoko partaideek. Uhartea bisitatuz horri buelta ematen hasi nahi dute, “Europa berri desberdin” baten alde ekiteko.

Egitasmoari buruzko informazioa, argazkiak eta bestelako materialak argitaratuko dituzte Harresirik Gaberen webgunean eta sare sozialetan ere izango dute presentzia, Twitter eta Facebook bidez.