Eguerdiko 12etan abiatu zen jendetza Galiziako bandera erraldoi baten atzetik. ‘Galizia burujabetasunaren alde’ lelopean, nazioaren erabakitzeko eskubidea aldarrikatu zuten, baita PPren politikek eragin duten “egoera larria” eta suteen kudeaketa kaskarra salatu ere.

Hainbat eragile eta kolektibotako partaideen agerraldiaren ostean, Xavier Vence BNGko bozeramaileak hartu zuen hitza. Bere hitzetan, Madriletik inposatzen diren neurrien kontrako mobilizazioetara bideratu behar dute haserrea herritarrek.  “Ezinbestekoa da PPk Galizian eta Madrilen aplikatzen dituen politikak aldatzea. Ikuspuntu sozialetik zein ekonomikotik jasanezina da egungo egoera”.

Manifestazioa inflexio-puntu izatea nahi zuela adierazi zuen Vencek. “PPk martxan duen zentralizazio prozesua eten behar dugu, Galiziak erabakitzeko eskubidea berreskura dezan”. Zentzu horretan, Katalunia eredugarria da BNGko bozeramailearentzat: Frogatu dute herri bat, kanpoko laguntzaren zain egon gabe, arazoak bere kabuz konpontzen saiatzen bada, etorkizun hobe bat posible dela".

Ekitaldiari buruzko bideoa egin dute GalizaVideoTV -ko kideek.