Firefox Quantum berria aurkeztu dute: azkarragoa eta arinagoa

  • Meritua dute Firefoxek eta Mozilla Fundazioak. Meritu itzela. Googlek, Applek eta Microsoftek dominatzen duten munduan, irabazi asmorik gabeko fundazio libre eta independiente batek aurre egiten die Interneteko erraldoiei, Asterixen herrixkak Erromako Inperioari lez. Deskargatzeko prest dago Firefox 57 Quantum nabigatzaile berria: arinagoa, azkarragoa, seguruagoa,... Eta, gainera, librea eta euskaraz. Ba ote arrazoirik beste nabigatzaile bat erabiltzeko?

Artikulu hau CC BY-SA 3.0 lizentziari esker ekarri dugu.

2017ko azaroaren 29an - 08:35

Urrian aipatu genuen lehenengo Firefox Quantum nabigatzaile berria. Mozilla Fundazioak garatzen duen Firefox nabigatzailearen azkenengo bertsioa, baina aurreko guztiekin erabat ezberdina izango dena (azpiegitura ezberdina, potenteagoa, bizkorragoa,...). 2004az geroztik, Firefoxek izan duen eraldaketarik handiena dakar Firefox 57 - Quantum berri honek. Zenbait astez Beta fasean egon ondoren, atzotik prest dago edonork instalatzeko moduan.

"Azkarra da, oso azkarra. Aurreko Firefox bertsioa baino 2 aldiz azkarragoa", azpimarratu dute garatzaileek bere blogean. Eta arinagoa ere bai, askoz baliabide gutxiago beharko dituena. Izan ere, horiexek dira nabarmendu dituzten ezaugarrietako batzuk (guk ere probatu ondoren baieztatu ditugunak): 

  • Abiadura: Firefoxen azken bertsio hau oso azkarra da. Klik egin eta berehala kargatzen dira orrialdeak. Chrome baino bizkorragoa dela diote garatzaileek, eta horrela azaldu dute bideo baten bidez (Chrome eta Firefox alderatuz).
  • Errendimendua eta arintasuna: azpiegitura teknikoan egindako aldaketen ondorioz, nabigatzailearen errendimendua askoz hobea da, ordenagailuaren (edo mugikorraren) baliabide gutxiago behar digu funtzionatzeko. Gailuak arinago dabiltza eta bateria gutxiago gastatzen dute.
  • Interfazea: oraingoa baino askoz garbiagoa, minimalistagoa. Edukian jartzen du foko guztia.

 

 

Mozilla, Interneteko handiei aurre egiteko prest

Interneteko garapenean hainbat guda daude zabalik, besteak beste nabigatzaileen guda. Egia esateko, irabazle garbia dauka guda horrek gaur egun, Googleren Chromek merkatuaren erdia baitauka (%55). Bere atzetik datoz, nahiko atzean, Appleren Safari (merkatuaren % 15), UC (%7) eta Mozillaren Firefox (%6); are atzerago Microsoften Edge, Opera eta abar. 

Merkatuaren %6a "bakarrik" izatea, baina, ez da gutxi Mozilla bezalako fundazio txiki batentzat. Orain dela 10 urteko datuetatik urruti daude gaur egun (%20-30 inguruan ere ibili ziren Chrome sortu aurretik), baina merkatuaren egungo egoera, batez ere smartphoneen zabalkundea hasi zenetik, oso ezberdina da, eta Firefoxek bizirik irautea lortu du. Ez da gutxi. Ikusi, bestela, non dagoen Microsoften Explorer (gaur egun Edge), garai batean merkatuaren %90etik gora zuena eta gaur egun erabat bazterrekoa dena (%2,2 azken hilabetean).

Gogoan izan, Interneteko enpresa handienen aurkako borrokan ari dela Firefox; Googlek, Applek eta Microsoftek euren gailuetan lehenetsita dakartzaten nabigatzaileen lekua hartu nahian. Eta hori ez da erraza, noski. Nire mugikorrean Chrome edo Safari instalatuta baditut, zertarako hartu lana Firefox instalatzeko? 

Firefoxen erantzunak bi alde ditu. Bata, lehenengoa, teknikoa: Firefox ona delako. Baina badu bigarren erantzun bat ere, filosofikoagoa: Firefox librea delako. Izan ere, Mozillak aldarrikatzen duenak hausnarrerako sua piztu beharko liguke, bederen. Irabazi asmorik gabeko erakundea da, independientea, Internauton premiak babestu beste helburutik ez duena, Internauton segurtasuna bermatuz, horretarako nabigatzaile libre bat garatzen duena, komunitate zabal batek eskaintzen duen indarrarekin, Internautongan (bakarrik) pentsatua... Marka handiek dominatzen duten mundu honetan, askatasunaren aldeko aldarria ere bada Mozillarena.  

Internauta askok pentsatuko dute: "ba ote arrazoirik Firefox erabiltzeko?". Eta, beharbada, galdera da: ba ote arrazoirik Firefox ez erabiltzeko?

Erreportaje hau Sustatuk argitaratu du eta CC-by-sa lizentziari esker ekarri dugu ARGIAra


Kanal honetatik interesatuko zaizu: Software librea
AntennaPod: entzun podcast guztiak aplikazio bakarrean

Martxoaren 15ean RSSak (Really Simple Syndication) 25 urte bete ditu. Gehienek ez dakite zer den eta beste batzuk hiltzat jotzen dute, baina teknologia burujabetza ikuspuntutik oso interesgarria izaten jarraitzen du eta bizi-bizirik dago. Bitartekaririk gabe gure intereseko... [+]


Google Analytics-en alternatiba librea den Matomo euskaraz erabil daiteke

Webguneen arduradunek beren bisitarien trafikoa aztertu nahi izaten dute, baina horretarako gehien erabiltzen den Google Analytics tresnak pribatutasun eta lege arazoak ditu. Alternatiba etikoago bezala gehien erabiltzen den Matomo software librea euskaratu du Iametzak.


Software librea erabiltzen duten ikastetxeek beraien esperientzia azaldu dute Eusko Legebiltzarrean

Software librea erabiltzen duten Lezo BHI, Irungo Hirubide BHI eta Donostiako Antigua-Luberri BHI ikastetxeek beren esperientzia azaldu dute Eusko Legebiltzarreko Hezkuntza batzordean, EH Bilduko Lore Martinez Axpek eskatuta. Institutuetako ordezkarien aurkezpenen bideoak [+]


Whatsapp-a ez da izango EAEko hezkuntzako oposizioetan akreditazioa lortzeko bide bakarra

Eztabaida eragin zuen 2023ko urriaren 21ko EAEko irakasleen oposizioetara sartzeko Whatsapp bidez jasotako QR kodea erabili beharrak. Azkenean, akreditazioa webgune baten bidez eskuratzeko aukera ere eman zuen Eusko Jaurlaritzako Hezkuntza Sailak. Hemendik aurrera... [+]


Eguneraketa berriak daude