Testu hau sinatzen dugun hogei elkarteek, datorren agorrilean/abuztuan ZADen eraikiko den nazioarteko herrien eta borroken etxolaren auzolanera joateko deialdi bateratua egiten dugu. Munduko leku desberdinetatik etorriko diren beste hainbat talde eta jenderekin, Anbazadaren proiektua gorpuzteko aukera ukanen dugu hilabete osoan zehar. Gune berri horren eraikuntzak, etorkizunean, bakoitzaren egin molde eta helburuak trukatuko ditu, elkartasunari ateak irekitzeko.

Ildo beretik, joan diren ekainaren 14an eta 17an, bi bilkura ireki antolatu ziren Hazparnen eta Gasteizen, Euskal Herriko kolektibo eta norbanako batzuen parte hartzearekin. Aniztasuna euskarri, elkar ezagutza egin genuen, bakoitzaren errealitateak partekatuz. Saretzea, autogestioa eta elkar zaintza izan ziren, besteak beste, gehien entzun ziren hitzak eta praktikak. Kanporaketa mehatxupean dauden aske guneei arreta berezia jarriz (Errekaleor, Tosu), auzolanetan aritzea adostu dugu.

Sortu berri den eztabaida eta iniziatiba topagune honek balore inportante batzuk jarri nahi ditu martxan, beti ere molde irekian. Horizontaltasun, gardentasun eta inklusibitateari eman nahi die leku, Euskal Herrian zehar dauden herrigintza esperientzia eta dinamika militanteen indarberritzean parte hartzeko, esparru askotan burutzen ari diren hausnarketa eta proposamenen bateragarri.

Datorren urriaren 21ean, Getxoko Tosu aske gunean antolatuko dugun asanbladara etortzeko deialdia luzatu nahi dizuegu gaurtik, lehen bilkuretara agertu ez ziren elkarteei gomita berezia eginez, konbergentziaren ildotik norabide komunak asmatzeko, lanabes eraginkorrekin.

Ekar dezagun euskal alkimia munduko iraulketara. Lurra eta Askatasuna!

Deialdi honen sinatzaileak :

AHT Gelditu! elkarlana

Aldaxka kolektiboa (Baiona)

Amarauna kolektiboa (Ziordia)

Arditurriko errepublika (Oiartzun)

Askapena

Beasaingo gaztetxea

Bizi Toki (Behauze)

Ekologistak Martxan

Eleak-Libre dinamika

Errekaleor auzo askea (Gasteiz)

Euskal Herria Zuzenean

Firestone lantegi berreskuratua (Añorga)

Hendaiako Gaztetxea

Indar Beltza

Ipeh antifaxista

Lurralde Askea

Mamarigako kultur etxea (Santurtzi)

Stop Mines elkartea

Tosu Betirako (Getxo)

Txerrimuño baserria (Lezo)

Zer da munduko borroken ambaZADa?

Notre-Dame-des-Landes-eko ZAD bihotzean, egitasmo berri bat lurretik jalgi da: zentro intergalaktiko baten sortzea,  hemengo eta beste nonbaiteko borrokak biltzeko.

Etxola antzekoa izanen da, kolektiboen, dinamika ekintzaileen eta herri minorizatuen eskura, ekitaldi mota guztiak gauzatzeko. Gure indarrak biltzeko tresna,  mugarik gabekoa, elkartasun, konbergentzia eta laguntzan finkatua. Leku funtzional eta atsegina, non etxean bezala eta besteekin bat senti baikintezkeen.

Mundu osoan zabaldua da deiadarra anbaZADa proiektu hau irekitzeko, errotzeko eta margotzeko, dagoeneko bizi praktika ugarik eta erresistentzia anitzek zeharkatzen duten  lurralde honetan, sare interplanetario baten oinarriak finkatu nahian.

Eraikuntza kolektiboko gune bat antolatuko da uda honetan. Parada egokia izanen da kulturen, gaitasunen, esperientzien eta elkarrekiko bizitzen gurutzatzeko, eta hain segur handik egitasmo berriak aterako dira: hori dugu helburua.

Uztailaren amaieran kanpamendu auto-zuzendu eta parte-hartzailea apailatuko da, abuztuaren amaiera arte; beste egitekoen artean, agorrilaren 7tik 15era aireportuaren aurkako laguntza batzordeekin batzarrak izanen dira, eta agorrilaren 12tik 20ra ihardunaldi intergalaktikoak ospatuko ditugu.

Beraz, agorril honetan badugu hitzordua elkarrekin etorkizun berri baten izerdia altxarazteko, aireporturik eta bere mundurik gabekoa.

Lurra eta Askatasuna !

Euskal Herrian zehar, hitzordu hauetara etortzeko dei kanpaina martxan jarria da. Abuztuan etorri nahi duen edonori, bere izena helbide honetara bidali dezan eskatzen diogu: ehzadista@yahoo.com. Bakoitzari xehetasunak emanen dizkiogu (nola heldu eta zer ekarri, auzolanen eta kanpaldiaren ibilmoldea, etab).