Espainiarentzat zaila izango da Anna Gabriel Suitzatik estraditatzea

  • Anna Gabriel CUPeko kideak Espainiako Auzitegi Gorenean ez aurkeztea eta Genevan (Suitza) geratzea erabaki ondoren, Espainiako medioak haren balizko estradizioari begira jarri dira. Baina, aukera horren alde agertzen diren hedabideek ere, ez dauzkate gauzak argi.

Anna Gabriel Suitzan dago eta ez da Espainiako Auzitegi Gorenaren aurrera joango.

2018ko otsailaren 21an - 09:16

El País egunkariak gaia aztertu du ikuspegi juridikotik, Reyes Rincón eta Fernando J. Pérezek sinatutako artikulu batean. Gabrielen estradizio prozesua luzea izan daitekeela uste dute eta haren “arrakasta” ez dagoela ziurtatuta.

Izan ere, artikuluaren arabera, Suitzako legediak estradizioa ukatzera derrigortzen du, balizko delituak Suitzako legislazioaren ikuspegitik “izaera nagusiki politikoa” baldin badauka. Hain zuzen argudio hori erabili du Anna Gabrielek herrialdeko kazetari bati egindako lehen adierazpenetan: “Nire jarduera politikoarengatik prozesatu naute eta Gobernuaren prentsak dagoeneko kondenatu nau”, esan zion Gabrielek Le Temps egunkari suitzarrari.

Gainera, El Paísek, Suitzako Justizia Ministerioko iturriak aipatuz, azaldu du herrialdean ez dutela ikusten estradizioa baimentzeko oinarri juridikorik.

"Sedizio" delituaren trikimailua

Ñabarduretan sartuta, Gabrieli leporatzen zaizkion delituetako batek gutxienez bi herrialdeetan zigortuta egon behar luke eta El Paíseko kazetariek nabarmendu dute herrialdeko Kode Penalak 265. artikuluan zigortzen dituela “Konstituzioa edo kantoi bateko Konstituzioa biolentzia erabiliz aldatzea”, baita “biolentzia erabiliz eragoztea agintari politikoek euren boterea egikaritzea” eta “biolentzia erabiliz lurraldearen zati bat banantzea” ere.

Hori izan da Kataluniako erreferendumaz geroztik, auzi honen iltzeetako bat: independentzia prozesuarekin lotuta “sedizio” eta “matxinada” delituak leporatu nahi izan dizkiete ordezkari politiko independentistei, nahiz eta Kode Penalak delitu horiek metodo biolentoekin lotzen dituen –Kataluniako agintariek erabili ez dituzten metodoekin, alegia–.

Carles Puigdemont Belgikan egotearekin dauzkan problemen antzekoak edukiko lituzke Espainiak, beraz, Anna Gabrielekin. Diferentzia nabarmenena, estradizioa onartuz gero CUPeko kidea entregatzeko prozeduran legoke: Suitza Europar Batasuneko kide ez denez, EBko herrialdeen artean ohikoa den estradizio mekanismoak ez du balio kasu honetarako.

Gainera, Suitzako botere exekutiboak izango luke erabakian azken hitza. Eta Gabrielek asilo politikoa eskatuko balu, are gehiago zailduko litzaioke estradizioa Espainiari.


Kanal honetatik interesatuko zaizu: Katalunia independentziarantz
Junts-PSOE akordioa
Amnistia legea eta negoziazio mahai berria, legealdi akordioaren truke

Akordioaren bidez Juntsek eta PSOEk Kataluniako gatazka historikoa bideratuko duen etapa berri bat ireki nahi dute. Horretarako, bi indarren arteko negoziazio mahai bat eratu dute eta bertako edukiak eta akordioak segitzeko bitartekaritza mekanismoa adostu ere bai.


'La Directa' babestu dute ARGIAk eta beste hainbat hedabidek: "Kazetaritza ez da terrorismoa"

La Directa-k salatu du Jesús Rodríguez kazetaria inputatu izana “informaziorako eskubidearen aurkako erasoa” dela. Elkartasun manifestua plazaratu dute Rodríguezi babesa helarazteko, eta dozenaka hedabide eta erakundek sinatu dute jada, ARGIAk... [+]


La Directako kazetari bat ere "terrorismoagatik" inputatu dute Tsunami Demokratikoaren auzian

Espainiako Auzitegi Nazionalak “terrorismo-delitua” egotzi dio Jesús Rodríguez La Directako erredaktoreari eta beste hamaika pertsonari, tartean Carles Puigdemont presidente ohi eta Marta Rovira ERCko idazkari nagusiari, 2019ko epaiaren aurkako... [+]


Puigdemont eta Rovira inputatu ditu Auzitegi Nazionalak Tsunami Demokratikoagatik

Espainiako Auzitegi Nazionala 2019ko udazkeneko protestetan “terrorismo” deliturik izan ote zen ikertzen ari da. Bitartean, PSOEko eta JxCko ordezkariak Bruselan bilduta daude.


Jordien indultua egokia dela onartu dute eta Miquel Buch kontseilari ohia lau urtera zigortu

Ostegun honetan ezagutu dira bi epaiak. Batean, Espainiako Auzitegi Gorenak balekotzat eman ditu Jordi Cuixart eta Jordi Sánchezen indultuak. Bestean, Bartzelonako Auzitegiak laur urte eta erdiko kartzela zigorra jarri dio Miquel Buch Generalitateko Barne kontseilari... [+]


Eguneraketa berriak daude