Ebazpenaren emaitza NBEren Segurtasun Kontseiluaren blokeotik dator, pasa den astean AEBek betoa jarri baitzioten antzeko ebazpen bati: su-etena, bahituen askapena eta laguntza humanitarioa baimentzea eskatzen zuen. Espainiako Estatuaren proposamenaren testuak baldintza horiek guztiak jaso ditu eta aldi berean Israelen aurkako diskurtsoa gogortu du “nazioarteko eskubidea bortxatzeagatik” kontuak eman behar dituela nabarmenduta.

"Israeli, potentzia okupatzaileari, eskatzen dio blokeoa berehala amaitzea, mugako pasabide guztiak irekitzea eta laguntza Zerrenda osoan Palestinako biztanleria zibilari iristen zaiola ziurtatzea", dio testuak. "Zibilen gosetea gerra-metodo gisa erabiltzea eta sarbide humanitarioa legez kanpo uztea gaitzesten ditu". 

Nazio Batuen Erakundea

12 estatu bakarrik agertu dira kontra, tartean dira AEBak, Israel, Hungaria, Argentina eta Paraguai. NBEko Batzar Orokorraren ebazpenak, Segurtasun Kontseilukoak ez bezala, ez dira lotesleak, baina onartuak izateko gehiengo erlatiboa baino ez dute behar. Horregatik Batzar Orokorrean Palestinaren aldeko hainbat ebazpen onartu dira. Segurtasun Kontseiluan aldiz, bost kide iraunkor daude eta beto eskubidea daukate, hau da, haietako bakar batek kontra bozkatuz gero ebazpena ez du aurrera egingo, hauek dira beto eskubide duten munduko estatu bakarrak: Txina, AEB, Errusia, Frantzia eta Erresuma Batua.