Espainiar gobernuko presidente Pedro Sánchezek Cadena Ser irrati katean aurreratu duenez, gas naturalaren BEZa %21etik %5era jaitsiko dute urritik aurrera. Neurriarekin, "klase ertain langilea babestu" nahi dutela adierazi du agintariak, hornigai horren prezioen gorakadari aurre egiteko, eta "jaitsiera fiskal selektiboen" testuinguruan kokatu du.

"Zentzukoa da herritarren berogailuen faktura jaitsi nahi izatea", esan du Sánchezek, eta Ukrainako gerrari zeharka erreferentzia eginez  "ziurgabetasun handiko" egoera batean gaudela adierazi du. Neurria, hasiera batean, urritik abendura arte egongo da indarrean, baina ez du baztertu aurrerago epea zabaltzea.

Modu horretan, Sánchezen gobernuak erantzuna eman dio PP alderdiak sarritan egin dion gasaren BEZa jaisteko eskariari eta asteartean Espainiako Senatuan gai horren inguruan aurreikusita dagoen eztabaidari aurre hartu dio.