Lomce legea bere osotasunean indarrean jartzearekin batera, 2015-2016 ikasturtean erlijio irakasgaia batxilergoko azken notarako ebaluagarria izango da. Hala ere, Arabako, Bizkaiko eta Gipuzkoako batxilergoko ikasleen %8,7k baino ez du aukeratu ikasgai hau.

Zehazki, batxilergoan arituko diren 15.102 ikasleen artean 1.309k aukeratu dute erlijioa; 6.399k erlijioaren ordezkoa den balore etikoak hautatu dute, eta gainontzekoek historia, marrazketa teknikoa edota kimika bezalako beste hautazko bat.

Eusko Jaurlaritzako Hezkuntza Sailaren datuen arabera, 120 ikastetxetik 26k baino ez dute osatu erlijiorako taldea (gutxienez hamabost ikasle matrikulatu behar dira taldea osatzeko). 34 zentrotan ez da eskaerarik izan, eta 35etan bost eskaera baino gutxiago izan dituzte.

Erlijioa aukeratu duten ikasleek  ez badute talderik euren ikastetxeetan, urrutiko hezkuntza programaren bitartez jaso ahalko dute. 2010etik dago martxan programa, eta ikasgai batean talderik ez duten ikasleei zuzendua dago.

Ordu gutxiago erlijioari

Era berean, erlijio ikasgaiari Hezkuntza Sailak emandako ordu kopurua %33 jaitsi da. Murrizketa posible izan da Lomcek, 90 minututik 45era jaitsi duelako astean erlijioari eskainitako denbora aurreko hezkuntza legea zen LOEkin alderatuz gero. Gaur egun, Hego Euskal Herrian, erlijio ikasgaia modalitate ugaritan (katolikoa, ebangelikoa, islamikoa eta judua), haur hezkuntzako bigarren zikloan, lehen hezkuntzan, DBHn eta batxilergoan eskaintzen da.