Bilbo: “Ez beti da ez. Tematzea jazartzea da. Jazartzea erasotzea da”

Bilbo lilaz jantziko da berdintasunaren alde. Txupinazoan baloi lilak banatuko dira eta jai bukaeran, Marijaiaren erreketan, kolore bereko su artifizialak nagusituko dira. Autobusak eta tranbiak ere lilaz jantziko dira aurtengo Aste Nagusian.

“Egin keinu berdintasunari” photocall ibiltaria ere antolatu du Udalak. Bertaratzen direnek mezuak utzi ahal izango dituzte eta argazkiak www.bilbao.net/geubiok, webgunean eskegiko dira.

Iaz alkatetzako Berdintasun Kontsailaritza eta Bilboko konpartsak batu ziren aholkularitza kanpaina bat martxan jartzeko. Aurten 600 saltokik eta 241 ostalaritza-lokalek  kanpainarekin bat egin dute.

Bilboko Udalaren eraso sexisten kontrako protokoloak lau urte daramatza martxan eta 400 polizia mugiarazten ditu Aste Nagusian.

Donostia: Etxeko lanen banaketa, festetan ere

Donostiako Udalak portutik Bulebarrera mugituko den karpa bat jarriko du, eraso sexistei buruz informatzeko, ohartarazteko eta kontzientziatzeko. Tailerrak eta jarduerak ere izango dira, eta adituak egongo dira herritarren galderei erantzuteko.

Naiara Sampedro Berdintasun zinegotziak salatu du emakumeek gizonek baino ordu eta erdi gehiago ematen dutela etxeko lanetan, eta festetan lana handitzen dela.

Etxeko lanen banaketa aldarrikatu du Donostiako Udalak, festetaz denok berdin gozatu ahal izateko.

Gasteiz: “Ez dut olagarrorik nahi konpainiako animali bezala”

Andra Zuriaren jaietan ere hainbat ekimen egin dituzte gai honen inguruan kontzientziatzeko “Ez dut olagarroa konpainiako animali bezala nahi” lemapean.

Elkarte feministek “tetatinen” (blusek nesken bularretan jartzen dituzten pegatinak) kontrako aldarrikapena egin dute.