EH BAIk Zigor Garroren kanporaketa salatu du
Zigor Garro euskal preso politiko ohiaren aurkako prozesua abiatu dute, eta Frantziako Estatutik kanporatuko dute. EH BAIk salatu egin du erabaki hori, egungo osasun larrialdi egoeran mota horretako kanporaketa bat “ulertezintzat” jotzen duelako, eta euskal preso politiko ohiek eskubide zibil eta politiko guztiak izatea aldarrikatzen duelako.
aurre egingo dieten hedabide independenteak
Azaroan geratu zen aske Zigor Garro preso ohi oreretatarra. Ordutik Hendaian bizi da, baldintzapeko askatasuneko erregimenean. Orain, ordea, bere aurkako prozesua abiatu dute, eta horrek bere kanporaketa bultzatuko du.
EH BAIk komunikatua kaleratu du kanporaketa salatuz. Alde batetik, gaur egungo osasun egoera tarteko, horrelako kanporaketak gauzatzea onartzen ez dutelako. Gehitu dute duela hilabete batzuk Zigor Garroren defentsak lurralde debekua behin betiko altxatzeko eskaera egin bazuen ere oraindik erantzunik ez duela jaso.
Beste alde batetik, preso politiko ohia eskubide zibil eta politiko guztien jabe izatea aldarrikatu dute, baita Euskal Herri osoan libreki mugitzeko eskubidea izatea ere.
