Herriz herri 30 bat bilera eginik larunbatean, azaroaren 26an, eginen du bere lehen kongresua EH Bai koalizio abertzaleak. Hitzordua 08:30ean jarri dute Baionako Elkarteen Etxean. Azken hilabeteetan marraztu, moldatu, mamitu proiektu politikoa eta egituraketa berria bozkatuko dituzte. Antolatu duten lehen kongresua "une garrantzitsutzat" jo dute koalizioko militanteek.

Zehazkiago, bozkatzekoa den proposamenean aliantzek garrantzia handia dute, Anita Lopepe eta Ibai Agirrebarrenak Kazeta.eus-i eskainitako elkarrizketan irakurri daitekeenez: "Alde batetik, 'karrikako ekintza' deitzen diogun ildoa dago eta hor parioa egiten dugu mugimendu sozialetan parte hartzea eta bultzatzea. Hots, aliantza ahal den zabalena bilatzea hobesten dugu. Beste aliantza eskema hauteskundeena litzateke. Gure buruari anbizio handiagorekin jokatuz garaipena lortzeko helburua emanen diogu. Hori erranda, hauteskunde bakoitzaren arabera EH Bai-k beharko ditu hautuak egin". Bi aldeen artean "osagarritasuna" bermatu nahiko lukete. Instituzioetan egon nahi dute, ahal bezainbat eta horretarako aliantzak dauzkate tresna eraginkor gisa. "Zuzendaritza berriak aski fite beharko du gogoetatu nola izanen garen, baldintza onenetan ahal den eta herri gehienetan gobernatzeko eta, ondorioz, gure pisua emendatzeko Euskal Elkargoan", Lopeperen hitzetan. 2026ko herri hauteskundeei begira dira jadanik., Enbata-ko L´institution au coeur du congrès d´EH Bai frantsesezko artikuluan ondokoa irakurri daiteke: "Azken urteetan ezagutu den garapenak hautetsien kopurua biderkatu du eta, beraz, mugimendu abertzalea erantzukizun instituzional berrien aurrean jartzen du. Hori ez da egin behar lan ideologikoaren kaltetan, ez eta ere mugimenduak beste sektore batzuekin parteka ditzakeen borroka sektorialen kaltetan":

Euskal Hirigune Elkargotik harago

2017an Euskal Hirigune Elkargoa sortu izana begi onez baloratu bazuen ere, urrats bat harago joateko beharra sentitzen du EH Bai-k, eta gerora ere, horren alde jarri nahi lituzke indarrak. Hain zuzen, Enbata-ko artikuluan irakurri daitekeen bezala, "ezkerreko abertzaleak egitura honen lortzeko borrokaren lehen lerroan egon badira ere, ez delako inoiz lurraldearen aldarrikapena izan, 2011az geroztik askotariko eragile sozial eta politikoak estatutu bereziko lurralde elkargo baten sorreraren aldarriaren barruan batzen zirelako".

Horrez gain, euskararen aitortza, azterketak euskaraz pasatzearen aldarria, presoen etxeratzea, zein espekulazioaren kontrako mugimendua... hainbat gaik babes sozial zabala daukatela eta, hori guztia "burujabetzaren" markoaren barruan kokatu nahi luke EH Bai-k, hots, "herri izaeratik" bideratuz. Hala ere, Kazeta.eus-i zehaztu diotenez, ez dute burujabetzaz gehiegi eztabaidatuko: "Edonola ere, ez dugu denbora gehiegi emanen kontzeptuari buruz eztabaidan, gehiago behar delako logika horren alde egin, eta gure apustua da proposatzen dugun jendarte eraldaketa eremu guztietara iristea. Ez diogu beldurrik pragmatismoz jokatzeari"

2007an juntatu ziren EH Bai koalizioaren barruan Abertzaleen Batasuna, Batasuna eta Eusko Alkartasuna alderdiak. Hamabost urtez hainbat borroka eramanik, eta instituzioetan garapena ezaguturik, egituraketa berria adostuko dute larunbateko kongresuan. Duela egun batzuk plazaratu zen Abertzaleen Batasunak desegitea erabaki duela, indar guztiak EH Bai-n emateko gisan. Jakina denez, egitura berrian alderdi abertzale bakoitzaren ordezkaritza bermatzea ez da gehiago baldintza izanen.

Kongresura gomitatu dute Frantziaren menpe diren nazioen ordezkaritza zabala: Kanakiako ministro Mickael Forrest, Polinesiako diputatu Tematai Le Gayic, Bretainiako UDB alderdiko Lydie Massard, Okzitaniatik David Grosclaude, Region et Peuple Solidaire federazioko zuzendari Peire Costa eta Korsikatik François Alfonsi.