Urte amaierak ez du albiste pozgarririk ekarri administrazioaren eskutik, gurea bezalako komunikazio proiektuentzat. Eusko Jaurlaritzak 6 milioi euro banatu ditu hedabideen artean, COVID19aren pandemiak eragindako kalteei aurre egiteko ez-ohiko deialdian, eta berriz ere ARGIA kanpoan geratu da. Baina gure proiektuak aurrera jarraitzen du –Durangoko Azokan sentitu genuen zuetako askoren berotasuna–, eta ez dugu umorerik galdu.

ARGIAk urte amaierarako harpidetza kanpaina jarri du martxan, eta barruko zalantzak, zailtasunak, kontraesanak eta korapiloak erakutsi ditugu pantailan, umoretsu, ironiaz, gure komunitateari ARGIA babes dezan gonbita egiteko. Kazetaritza independentea bultzatzeko komunitatearekiko dependentzia azpimarratzea, ez al da kuriosoa eta pentsatzekoa? Hemen dituzue bideo guztiak ikusgai.

Urrutira joan gabe, lehendik ere ARGIAren baloreak ondo ezagutzen dituen jendea da proiektu honekin bat egitera animatu nahi izan duguna, azken batean jendearen babesarekin lortzen delako kazetaritza independentea egitea eta ekonomikoki ere komunitateko kideen diru-ekarpena baita ARGIAren sostengu nagusiena. ARGIAko kiderik gabe ezin izango genuke urte amaierara arte iritsi, ezin izango genuke duela 25 urte interneterako jauzia eman, edo BTN bezalako podkastak egin; honek guztiak ez luke zentzurik zuek gabe, beraz, eskerrik asko bihotz bihotzez.

Hiru Damatxoko lagunek egin dituzte bideo-spotak, eta kazetariok eta langileok jarri gaituzte aktore-lanetan. Horrela, etxeko ateak ireki eta barrua ahalik eta modu naturalenean erakusteko aukera izan dugu. Noski, ahaztu gabe harpidetza kanpaina dela: aprobetxatu dugu ARGIAren harpidetza eredu berezia modu sinple eta ahalik eta ulergarrienean azaltzeko. Egungo testuinguru sozial eta ekonomikoarekin bete-betean datorren halako eredu bat, elkartasunean oinarritzen dena, eta besteak beste, euskara ofizial ez den tokietan euskara ikasten ari direnei aldizkaria doan bidaltzea bezalako ekimenak ahalbidetzen dituena.

Hortaz, oraindik proiektu honen parte ez bazara, argiago ezin esan: egin zaitez ARGIAkoa!

Besarkada bat ARGIA egiten dugun guztion partez!