ARGIA.eus

2020ko azaroaren 25a

Durangoko Azokarekin lotutako programazio musikala Hego Euskal Herriko hainbat aretotara zabalduko da

  • Durangoko Azokak iragarri du Euskal Herriko hainbat lekutan kontzertuak antolatuko dituela abenduaren 5etik 8ra. Helburua: pandemiaren aurkako neurrien eraginez Durangora joaterik izango ez dutenei ere Azokako giroa hurbiltzea. Gainera, urtarrileraino luzatuko dute Durangorekin lotutako eskaintza, liburu-dendetan eskuragarri egongo den katalogo baten bidez.

Gorka Bereziartua Mitxelena @gorka_bm
2020ko azaroaren 20a
Nerea Mujika Gerediaga elkarteko presidentea eta Bingen Zupiria Eusko Jaurlaritzako Kultura eta Hizkuntza Politikarako sailburua ostiral honetan Donostiako Dabadaba aretoan (argazkia: Durangoko Azoka).

“Zu non, han DA!” egitasmoaren berri eman dute ostiral honetan Durangoko Azoka antolatzen duen Gerediaga elkarteak eta Eusko Jaurlaritzako Kultura eta Hizkuntza Politikarako sailak. Bi zutabe izango ditu proiektuak: batetik, Hego Euskal Herriko hainbat aretotan antolatuko dituzten kontzertuak; eta bestetik Durangoko Azokako datak pasa ondoren liburu-dendetan aktibatuko den produktu kulturalen katalogoa.

COVID-19ari aurre egiteko neurriek eraginda, aurten Durangon bertan egingo den programazioa oso mugatua izango da beste urteetakoaren aldean. Landako gunean liburu-aurkezpenak eta ikus-entzunezko programazioa ikusi ahal izango dira besteak beste; eta Plateruenan berriz, emanaldi musikalak.

Azken horiek ez dira Durangora bakarrik mugatuko ordea: Amurrioko Burubion, Gasteizko Jimmy Jazzen, Bermeoko Kafe Antzokian, Bilboko Euskalduna jauregian, Ondarroako Beikozinin, Azpeitiko Sanagustinen eta Soreasun, Donostiako Dokan eta Dabadaban eta Atarrabiako Totemen ere Durangoko Azokarekin lotutako programazio musikala izango da, guztira 32 taldez osatua. Kontzertuak ordainpekoak izango dira eta azaroaren 21etik aurrera erosi ahalko dira txartelak Azokaren webgunean.

Honakoa izango da kontzertu-egitaraua:

Aretoetako tabernak itxita

Ostiral honetako prentsaurrekoak bazeukan morbo puntu bat kontzertuen iragarpen horrekin lotuta: Bingen Zupiria Eusko Jaurlaritzako Kultura sailburuak duela hilabete inguru Diario Vasco egunkariari egindako adierazpenek ezinegona eragin zuten areto musikalak kudeatzen dituztenen artean, lokal horiek alkoholaren kontsumoarekin lotu zituelako, besteak beste. Programazio honen aurkezpena sektore horri egindako keinutzat ere uler daiteke, beraz; hori bai, kazetariek galdetu dutenean ea Durangorekin lotutako saio hauetan aretoen tabernak ireki ahal izango diren, Zupiriak argi eta garbi itxi dio atea aukera horri.

Sailburuak behin baino gehiagotan azpimarratu du Durangoko zitak euskarazko “industria kulturalen” alorrean daukan garrantzia eta, alde horretatik, aurtengo edizioa horien biziraupenerako “erronka” izango dela baieztatu du. Horregatik herritarrei dei egin die “modu kolektiboan erantzuteko”, Zupiriaren arabera euskarazko produktuak erostea baita “industria” horren atzean dauden sortzaileak babesteko modua.

Liburu-dendetan abenduaren 9tik aurrera

Euskal Herriko hainbat lekutan egingo diren kontzertuez gain, ostiral honetako beste iragarpena izan da Azokako egunak pasatzean ere, Durangok liburu-dendetan presentzia izango duela. Nerea Mujika Gerediaga elkarteko presidenteak azaldu duenez, abenduaren 9tik 2021eko urtarrilaren 8ra bitartean Durangoko Azokako katalogoko produktuak salgai egongo dira Euskal Herriko “ahalik eta liburu-denda gehienetan”. Azaldu duenez, Gerediagak kudeatuko ditu bide horretatik egindako eskariak eta Elkar izango da banaketaz arduratuko dena.

Aurten Landakon saltoki presentzialik izango ez denez, Azokak iragarria zuen durangokoazoka.eus webgunea online salmentarako plataforma bihurtuko zuela; alde horretatik, badirudi ostiral honetan iragarri den liburu-dendetako katalogoak “Durango efektua” Eguberrietako erosketa-kanpainara luzatzeko bokazioa daukala. Gerediagako presidenteak zehaztu duenez, Euskadiko Liburu Ganbararen babesa dauka proiektu honek. Era berean, Eusko Jaurlaritzako Kultura sailari eskertu dio Azoka Durangotik kanpo zabaltzea ahalbidetuko duen proiektu honi emandako laguntza. 

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!


Durangoko Azoka 2020 kanaletik interesatuko zaizu...





Azkenak
EGILEA
Argia buletina
Egunaren laburpena
zure e-postan
Eguneraketa berriak daude