Astelehen goizean desalojatu du Ertzaintzak, Donostiako Udaltzaingoaren laguntzaz, Moraza kalean 32 gaztek okupatuta zuten eraikina. Hamarnaka lagun hurbildu ziren desalojoa salatzera eta kaleratutako gazteei elkartasuna adieraztera.

El Diario Vascok informatu duenez, Espainiako Poliziaren Atzerritarren sailaren zaintzapean dauden zortzi gaztetatik seik kanporatze-agindua jaso dute. Instituzioen esanetan, desalojoa “osasungarritasunarekin eta segurtasunarekin” arazoak direla eta egin dute.

“Erakundeek okupazioaren aurpegi ilegala bakarrik nabarmentzen dute. Berdin zaie eraikin oso bat urteetan hutsik egotea, nahiz eta gizartearen sektore babesgabeenek etxebizitza gabezia pairatu”, salatu du SOS Arrazakeria elkarteak.

Gazteek hamar hilabete inguru zeramatzaten bertan bizitzen, eta azken hilabeteak “ur eta argirik gabe” eman dituztela salatu dute. Horrez gain, “etengabeko jazarpen poliziala” pairatu dutela esan dute. Ekainean Ertzaintza baimenik gabe sartu zela salatu zuten, eta etxea goitik behera arakatu zutela. Orduan hiru gazte atxilotu eta hainbat zauritu izan ziren.

“Segurtasun faltaren argudio faltsua”

Instituzioek segurtasun faltaren argudio faltsua erabiltzen dutela salatu du arrazakeriaren aurkako elkarteak, eta desalojoa Eusko Jaurlaritzak duela gutxi publikaturiko Pobreziari eta Desberdintasunari buruzko txostenean plazaraturiko tesien aurkakoa dela esan dute.

Bestalde, polizien jokabideak babesgabeen aurkako zigorrak areagotu egiten dituela salatu dute, eta Atzerritarren Legeak lana lortzeko oztopo asko jartzen dizkietela esan dute. Halako egoerek atzerritarrak eta babesgabeak publikoki kriminalizatzen dituztela esanaz amaitu dute, gizartean ideia arrazista eta xenofoboak areagotuz.