Desobedientziagatik auzipetutako seiak Katalunian epaituko dituzte

  • Prozesu subirano zalearen aurkako epaiketa “arintzeko” banatu du kausa Auzitegi Gorenak. Defentsen argudioak baztertuta, Gorenak berretsi du berari dagokiola matxinadagatik auzipetutakoak epaitzea.

Igor Susaeta @berria
2018ko abenduaren 28a

“Banaezina” da Kataluniako prozesu subiranistaren aurkako auzi judiziala. Manuel Marchena Espainiako Auzitegi Goreneko magistratuak, makroepaiketaren epaimahaiko presidenteak, horixe adierazi zuen auto batean, atzo. Halere, eta epaiketa “arintzeko” helburuarekin, desobedientziagatik auzipetutako seien kontrako epaiketa Kataluniako Auzitegi Nagusiaren esku uztea deliberatu du. Lluis Guino, Lluis Corominas, Anna Simo, Joan Josep Nuet eta Ramona Barrufet Kataluniako Parlamentuko Mahaiko kide kargugabetuak eta Mireia Boya CUPeko diputatu zena dira sei auzipetu horiek. Haientzat isun ekonomikoak eta 16-20 hilabete arteko inhabilitazioa eskatzen ditu fiskaltzak.

Prozesu subiranistaren harira matxinadagatik edo diru publikoa bidegabe erabiltzeagatik, edo biengatik, auzipetuta dauden hamabi buruzagi politikoen defentsek ere eskatu zuten beren bezeroek Katalunian epaituak izan behar zutela, iritzita, besteak beste, egozten zaizkien ustezko delituak Katalunian egin zituztela, forudunak zirela, eta ez dagokiola Gorenari horiek epaitzea. Baina Marchenak erantzun die ustezko delituak Kataluniako mugak gainditzen dituela —epaimahaiak aho batez hartu du erabakia—, eta aldebakarreko independentzia aldarrikapenaren eraginak handik kanpo zabaldu direla. Beraz, eta espero bezala, Gorenak epaituko ditu Oriol Junqueras, Carme Forcadell, Jordi Sanchez, Jordi Cuixart, Raul Romeva, Joaquim Forn, Jordi Turull, Josep Rull, Dolors Bassa, Santi Vila, Carles Mundo eta Meritxell Borras. Horiei zazpi eta 25 urte arteko kartzela zigorra ezar diezaietela eskatzen du fiskaltzak.

Gorenak atzo kaleratutako autoari ezingo diote helegiterik jarri. Defentsek hamar egun dituzte idazkiak aurkezteko —absoluzioa eskatzekotan dira—, eta alde guztiek frogak eskatu ahal izango dituzte. Gorenak ondoren erabakiko du horiek onartuko dituen ala ez, eta epaiketa noiz abiatuko duen jakinaraziko du –urtarril amaieran da hastekoa–.

 

Desobedientziagatik auzipetutakoen kausa Kataluniara eramateko, 'eraginkortasun arrazoiak' argudiatu ditu Gorenak, 'lotuta daudenak aurreikus daitekeen epaiketaren iraupenarekin eta konplexutasunarekin'. Irizpide aldaketa azaltzean, ordea, ez dio auziaren funts juridikoari heldu

Desobedientziagatik auzipetutakoen kausa Kataluniara eramateko, “eraginkortasun arrazoiak” argudiatu ditu Gorenak, “lotuta daudenak aurreikus daitekeen epaiketaren iraupenarekin eta konplexutasunarekin”. Irizpide aldaketa azaltzean, ordea, ez dio auziaren funts juridikoari heldu.

Matxinadagatik eta diru publikoa bidegabe erabiltzeagatik auzipetuta daudenei dagokienez, autoak dio “sistema konstituzionalak” ez duela aitortzen «etxetik gertu epaituak izateko eskubiderik». Bestalde, epaiketa aldibereko itzulpen sistema baten bidez egitea eskatu dute defentsek, auzipetuek katalanez mintzatzeko aukera eduki dezaten. Marchena magistratuak –hark idatzi du autoa– “irekita” utzi du aukera hori, eta eskaera horren inguruan xehetasun gehiago eskatu dizkie abokatuei. «Bat-batean» jasotako eskaera hori kritikatu du, ordea, nabarmenduz, horri dagokionez, prozesuak iraun duen «denbora luzean» akusatuek ez dutela «babesgabetasun kexarik» azaldu.

“Barren huste legitimoak”

Gorenak akusatuen eskubideak urratzen zituela argudiatu zuten defentsek joan den abenduaren 18an, epaiketaren aurretik egindako saioan. Andreu Van den Eynde Junquerasen eta Romevaren abokatuak orduan nabarmendu zuenez, adibidez, auzipetuak “politikariak dira politika egiten”. Eta Boyaren abokatu Carlos Lopezek salatu zuen, berriz, “estatu arrazoi bat” dagoela buruzagi subiranisten aurkako epaiketaren atzean: “Ez dago arrazoi juridikorik gertakariak epaituak izan daitezen”. Horren guztiaren harira, Marchenarentzat “barren huste legitimoak” dira abokatuenak, baina ez dute “inongo argudioen bermerik”.

Albiste hau Berria-k argitaratu du eta CC-by-sa lizentziari esker ekarri dugu ARGIAra.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal honetan artxibatua: Katalunia independentziarantz

Katalunia independentziarantz kanaletik interesatuko zaizu...
Azkenak
EGILEA
Eguneraketa berriak daude