"Kaleek diote herritarra nahi dutela lehen lerroan, eta ez botere ekonomikoa. Kaleetatik datorren energia edozein oztopo baino handiagoa da". Adierazpen horiekin ekin zion Rousseffek egitasmoari. Zehazki, bost itun proposatu ditu, garraioan, hezkuntzan, arlo fiskalean, osasunean eta politikan. Azken hori da esanguratsuena: batzar konstituziogile bat osatu ahal izateko erreferenduma deituko du eta batzar horrek erreforma politikoa gidatuko luke.

Erreformaren muinetako bat ustelkeriaren aurkako borroka izango dela aurreratu zuen presidenteak. Izan ere, manifestazioetan gehien entzun den kritiketako bat izan da berau. Legedi berrian ustelkeria "delitu ankertzat" hartuko litzateke eta "zigorrak askoz zorrotzagoak" izango lirateke.

Manifestazio jendetsuak

Duela kasik hiru aste, 2014ko Munduko Futbol Txapelketaren gestioa kritikatzeko 60.000 lagun inguru elkartu ziren Belo Horizonten. Hortik aurrera, 1980ko hamarkadatik Brasilen izan diren protesta jendetsuenak bizi izan dituzte egunotan, osasunean, hezkuntzan edota garraioan dauden hutsuneak salatzeko.

Atzo, Movimiento por el Pase Libre garraio arloko mugimenduarekin bildu zen Rousseff, ondoren herrialdeko 27 gobernatzaileekin eta hiri handienetako 26 alkaterekin elkartu zen. Tartean iragarri zuen erreforma politikorako nahia.