2003ko ekainaren 21ean argitaratu zen Berria egunkariaren lehen zenbakia, Espainiako Auzitegi Nazionalak indarrez itxitako Euskaldunon Egunkaria-ri eta horren ostean sortutako Egunero-ri txanda hartuta. Amagoia Mujika zuzendari berriak iragarri du udazkenera begira aldaketak egingo dituztela egunkarian, webgunean zein paperean.
Hogei urte bete ditu ekainaren 21 honetan Berria-k, eta hori horrela, hainbat ekitaldi, ekimen eta aldaketa egin ditu jadanik euskarazko egunkariak. Bi hamarkadatan bere zuzendari izandako Martxelo Otamendik lekukoa pasa dio Amagoia Mujika Tolaretxipiri. Hala jakinarazi zuten Berria Taldearen akziodunen batzarrean, pasa den ekainaren 3an.
Mujika zuzendariorde lanetan jardun izan da orain arte eta oso gertutik ezagutzen du egunkariaren ibilbidea, Euskaldunon Egunkaria-n eta Berria-n aritu izan baita lanean hainbat sailetan: "Eguneroko bizitzari aurre egiteko eta mundua ulertzeko behar dugun ezinbesteko informazioa eskura jartzea da gure xedea. Aldi konplexu hau ulertzeko inoiz baino beharrezkoagoa baita kazetaritza", idatzi du Berria-k 20. urteurrena dela eta kaleratutako gehigarri berezian.
Besteak beste, "jauzi digital garrantzitsu bat" egingo duela esan du Amagoia Mujika zuzendari berriak. Paperean zein webgunean diseinu aldaketa ere izango da
Jauzi digitala udazkenean
Otamendiri esker hitzak adierazi dizkio Mujikak: "Gure proiektuan bete-betean sinetsi duelako eta aurrera eramateko gaitasun aparta eduki duelako izan zen herri honetako gertakari lazgarrienetako baten protagonista". Eta horrez gain, datorren udazkenetik aurrera Berria-k izango dituen aldaketa batzuk ere iragarri ditu. Besteak beste, "jauzi digital garrantzitsu bat" egingo duela esan du zuzendari berriak. Paperean zein webgunean diseinu aldaketa ere izango da.
Itxiera batetik, irekiera
Duela hogei urte, Juan del Olmo Espainiako Auzitegi Nazionaleko epailearen aginduz Euskaldunon Egunkaria itxi zuen indarrez Guardia Zibilak. Operazioan hamar pertsona atxilotu zituzten, eta horietako hainbatek torturatuak izan zirela salatu zuten.
Itxieraren ostean Egunero kaleratzen hasi ziren, eta ondoren etorri zen Berria-ren sorrera, 2003ko ekainaren 21ean. Lehen zenbakiaren 50.000 ale banatu zituzten, Jon O. Urain kazetariak kontatu duenez.
Urteurren festa Tabakaleran
Pasa den larunbatean Berria-ak festa antolatu du Donostiako Tabakaleran, urteurrena ospatzeko. Politika, kultura eta gizarte arloko ordezkariak izan dira bertan.
Idurre Eskisabel Euskalgintzaren Kontseiluko idazkari nagusiak euskararen normalizaziorako "giltzarritzat" jo du egunkaria. Miren Dobaran Eusko Jaurlaritzako Hizkuntza Politikako sailburuordeak, berriz, egunkariak egindako "ezinbesteko ekarpena" nabarmendu du.
Ekitaldia Ibil Bedi musika taldeak girotu zuen, eta Ane Labaka eta Nerea Ibarzabal bertsolariek abestu zuten amaieran.
Nafarroako euskara hutseko irratiak 25 urte bete ditu eta Dialeko azkenak dokumentalean bildu dute bere ibilbidea. Maiatzaren 3an Larraintzarren estreinatuko dute, eta hurrengo asteetan Aizarotzen eta Erason egongo da ikusteko aukera.
Maiatzaren 18an, Gasteizen, egingo da mobilizazioa Aldatu gidoia euskararen alde lelopean. Kanpainan parte hartzen ari diren eragileek Eusko Jaurlaritzari eskatu diote euskararen aldeko politikak ezartzeko ikus-entzunezkoetan, eta EITBn beharrezko baliabideak jar ditzala... [+]
Donostiako Kursaal aretoan egindako ekitaldi batean aurkeztu du EITBk ostiralean Makusi, haur eta gaztetxoentzako euskarazko plataforma. Makusi.eus webgunean ikusgai dago jada, eta app ere ere eskuragarri dago. Doako haurrentzako euskarazko lehen plataforma... [+]
25 urte beteko ditu aurten Gara egunkariak. Ez da erraz izan. Teknologiak ekarritako iraultzari neurria hartuagatik ere, Espainiako auzitegietako epaileek erabakitako oztopo arbitrarioek egunean eguneko jarduna baldintzatu dute. Mirari hutsa, Iñaki Soto zuzendariaren... [+]