Aste politiko-kulturala Arrasateko gaztetxean, hitzaldiz josita
Zine proiekzio bat, eta hiru hitzaldiz hornitu dute AGAKOko kideek asteazkenean hasi eta zapatuan amaituko den aste politiko-kulturala. Egoera sozio-ekonomiko edo klase feminismoa bezalako gaiak jorratuko dituzte, eta lau egunez jarraian egongo zer ikasi eta zer hausnartu Arrasateko gaztetxean.
Hilaren 5ean arrazakeria eta biolentzia jorratzen dituen La Haine pelikula frantsesa proiektatuko dute 21:30ean. Bihar, 18:00etan, aldiz, Ekonomia politikoari kritika izenburupean hitzaldia egingo du Sarrikoko Ekonomia Kritikoko Taldeko kide batek. Talde honek gaur egungo ekonomia eredua kritikatzea du helburu, eta horrekin batera euren fakultatean irakasten dena kritikatu eta aldatzea.
Etzi, egubakoitza, Klase Femisnimoari buruzko hitzaldia egingo dute 18:30ean, batez ere gaur egungo sisteman emakumeek jasaten duten zapalkuntza barneratzeko asmoz. Azkenik, zapatu goizean, aske guneetako esperientziari buruz jardungo dute AKAB (Askatasun Kolektiboetarako Abokatuen sareko kideak) abokatu taldekoek.
>> Artikulu hau Goiena.eus webgunean plazaratu du Xabier Gorostidik. CC-By-SA lizentzia baliatuta ekarri dugu gurera.
