Guztira, 85 erakundek sinatu dute Jaiotzagatiko eta Adopzioagatiko Baimen Berdinen eta Eskualdaezinen Plataformak (PPiiNA) Espainiako Gobernuari egindako eskaera. Ofizialki erregistratu zuten egitasmoa eta erantzunik ez dutenez lortu, "azken deia egin dugu", adierazi dute erakundeko iturriek. 

2021eko urtarrilaren 1etik aurrera, bigarren gurasoaren baimena amak duen 16 asteko baimenarekin parekatuko da; baimenak berdinak, besterenezinak eta %100ean ordainduak izango dira, plataforma honek proposatzen zuen bezala. Hala ere, uste dute aukera hori gal daitekeela, bi "tranpa larri" ikusten diotelako legeari: batetik, lehenengo sei asteak nahitaez bi gurasoek aldi berean egitea eta bestetik, lanaldi osoko baimena hartzeko eskubidea galtzea. 

Plataformaren arabera, bi ezaugarri horiek eragin dezakete gizona bigarren zaintzaile gisa jardutea eta orain arteko zereginetara mugatzea, emakumearen esku geratuz zaintzaile nagusiaren rola. Gainera, plataformak uste du lehen sei aste horiek aldi berean egiteak haurraren zaintzari denbora kentzen diola.

Egitasmoa sinatu duten erakundeen artean, estatu mailako elkarte feministak daude, hala nola, Indarkeria matxisten aurkako 7N Plataforma, Politika feministaren Foruma edo Partaidetza eta Berdintasunaren aldeko Emakumeen Erakundeen Koordinakundea.