Antolatzaileek herritarrei dei egin diete norberaren hizkuntza ohiturak aztertzeko eta rol bat aukeratzeko. Bi rolak 2018ko edizioko berak dira, ahobizi eta belarriprest. Antolatzaileek rol bakoitzak zer dakarren eta hamabost egunetan herritarrek nola jokatu beharko luketen azaldu dute.

Belarriprest: Beraiei euskaraz hitz egiteko eskatzen dutenak dira belarriprest, euskara ulertzen dute eta beraiekin euskaraz aritzea nahi dute. Ulertzen duten guztiekin ez dute uneoro euskaraz hitz egingo agian, baina ahal eta nahi duten guztietan egingo dute. Gakoa jokaeran dago eta ez gaitasunean.

Ahobizi: Euskaraz ulertzen duten guztiekin euskaraz egingo dute ahobiziek. Euskaraz ulertzen ote duten ez dakienean lehen hitza, beti, euskaraz izango da; mintzakideak euskaraz ulertzen badu, euskaraz jarraituko dute beti. Gakoa ahal den guztietan euskaraz egitea da, jokaerak definitzen du rola, alegia.

Parte hartzeko bi baldintza bete behar dira: 16 urtetik gorakoa izatea eta gutxienez euskara ulertzeko gai izatea.

Aurtengo edizioan, iaz gutxiago parte hartu zuten adin tarte eta profiletan sakondu nahi dute, alegia,16-30 urte arteko gazteak, gizonezkoak eta belarriprest jokabidea hartuko dutenak.

Ariguneetan parte hartzeko asmoa dutenek ere izena eman beharko dute ahobizi edo belarriprest moduan.

Izena emateko hiru modu daude: euskaraldia.eus webgunean, herriz herri antolatutako batzordeetan, eta datorren astetik aurrera eskuragarri egongo den telefono aplikazioan.

412 herrik hartuko dute parte Euskaraldian, iaz baino zazpi gehiagok. 4.300 baino gehiago dira ariguneak sortzeko izena eman duten entitateetako zentroak, eta 13.000 arigunetik gora egongo dira.