Uztailaren 25etik abuztuaren 8ra bitartean, lau emanaldi egingo dituzte. Hirugarren urtez antzeztuko dute herritarrek Jean-Louis Davant-ek zuzendutako obra.
Jean-Louis Davant idazle eta euskaltzalearen Abdelkader obra antzeztuko dute uztailaren 25etik abuztuaren 8ra bitartean Urrüstoi-Larrabilen. Lanak Abdelkader emirraren bizitza du oinarri, XIX. mendearen erdialdean Frantziako Estatuak Aljeria konkistatzearen aurka altxatu zen gizona.
Pandemia dela-eta, aurreko urteko emanaldia atzeratu egin behar izan zuten. Aurten, hirugarren aldiz antzeztuko dute herritarrek obra. Segurtasun neurriak betetzeko, 1.000 ikuslerentzako lekua izango duten lau emanaldi egingo dituzte: uztailaren 25ean eta 30ean eta abuztuaren 1ean eta 8an.
Kazeta.eus hedabideak azaldu bezala, antzezlana arratsaldeko 15:30ean hasiko da igandero, eta aurretik zein ostetik, pastoraletako egun tradizionala ospatuko da Urrüstoi-Larrabilen. Meza, desfilea, animazioak eta bazkaria egongo dira hurbiltzen diren guztientzako. Horretaz gain, uztailaren 30eko emanaldia 20:30etara arte luzatuko da.
12 urtetik gorako edonor bertaratu daiteke emanaldira. Sarrerak 15 euroan daude salgai. Ipar Euskal Herriko hainbat puntutan eskuratu daitezke: Atharratzeko Piellenia ostatuan, Mauleko Xiberoko Bio dendan, Donapaleuko La Ferme Souletine dendan, Donibane Garaziko Paris denda-ostatuan eta Baionako Elkar dendan. Informazio gehiago xiberokojaunaalkartea@gmail.com helbidean.
Aurtengo urtea emankorra izango da pastoralei dagokionez, lau pastoral emango baitira; bi Zuberoan eta beste bi Zuberoatik kanpo: Iruñean (Nafarroa) eta Xarneguko (Lapurdi-Nafarroa Beherea) zonaldean. Gure herriko lau historia ezagutaraziko dira oholtzan antzerki,... [+]