Ötzi deituriko gizaki neolitikoari egindako azken froga genetikoek ezustea ekarri dute zientzialarien artera, eta agerian utzi dute bere irudi "okerra eta aurreiritziz betea" zabaldu izan dela orain arte.

Artzainaren gorpu momifikatua 1991n aurkitu zuten Alpeetan mendizale batzuek. Hain egoera onean egonik, duela 5.300 urteko europarrak nola ziren aztertu ahal izan dute arkeologo eta historialariek Ötziren arropak, fisikoa eta genomak aztertuta. Hala, jakin izan da zer ohitura zituzten orduko jendeek edo zer gaixotasun sufritzen zuten, eta nola hil zen "izotzetako gizakia", gezi batek jota.

Azal zurikoa eta begi eta iler argikoa irudikatu izan da orain arte gizaki hori. Hegoaldeko Tiroleko Arkeologia museoan paratuta dagoen tamaina errealeko figurak ere halako zerbait agerrarazten zuen. Baina Cell Genomic aldizkariak argitaraturiko ikerketa genetiko berri batek hankaz gora jarri du uste hori.

Ötzik azal beltzarana zuen, begi ilunak eta kasik burusoila zen. "Bistakoa da errekonstrukzioa okerra izan dela orain arte, Harri Aroko Europako gizaki batez dauzkagun gure egungo aurreiritziek eraginda", azaldu du Max Planck Eboluzioaren Antropologiako institutuko zuzendariak CNNren webgunean.

Gainera, ikerketak agerian utzi du gizaki horren jatorria zein izan zitekeen: dirudienez, Ötziren arbasoak Anatoliako lehen nekazariak izan ziren. Horrek adierazten du Europan migrazioak zein hedatuta zeuden jadanik duela milaka urte eta ez direla herengungo kontu bat.