A-8ko zaratarengatik protesta egiten duen bizilagunari 8.000 eurorainoko isuna jarri diezaioke Aldundiak

  • Gipuzkoako Foru Aldundiaren jakinarazpena jaso du A-8 autobideko zaratengatik protestan diharduen Joseba Olazabal mendaroarrak.

Barren .eus @barreneus
2017ko azaroaren 08a
Joseba Olazabalek protesta originala jarri zuen abian bere etxea A-8ko zaratatik babesteko pantaila akustikoak eskatzeko (argazkia: Barren).

Autobideko erabiltzaileen "arreta galtzea eragin dezaketen jarduerak" egiteari lagatzeko eta kartelik ez jartzeko errekerimendua jaso du Olazabalek. Bete ezean, 2.000 eta 8.000 euro bitarteko zigorra jaso dezakeela ohartarazi diote.

"Bide segurtasunaren kalterako, autobidearen erabiltzaileek arreta galtzea eragin dezaketen jarduerarik ez egitea, ezta kartelik jartzea ere" eskatu dio Gipuzkoako Foru Aldundiak Joseba Olazabali bidali dion aurretiazko errekerimenduan.

Bertan ageri denez, 1/06 F.D.A 96.4 artikulua urratzen ari da Olazabal, eta urraketa hori "larria" dela zehazten du. Eskaera "berehala" bete ezean, isuna 2.000 euro eta 7.999 euro bitartekoa izan daitekeela ohartarazten diote Olazabali. Honek bideo batean eman du jakinarazpenaz duen iritzia.

 

 

Joan den irailean Bidegik protestarako zerabiltzan kartelak kendu zizkiola salatu zuen Olazabalek.

Mendaroarra ezaguna egin da azken hilabeteetan, A-8 autobideko erabiltzaileen artean, bereziki, autobideko zarata salatzeko duen modu bitxiagatik. Biolina jotzen egoten da batzuetan, txirula besteetan, eta era eta mezu askotariko kartelak jarri izan ditu.

Olazabal autobide ondoan bizi da, Mendaroko Granja etxean. Autobideko joan-etorrien eta kamioien zaratarekin gogaituta, pantaila akustikoak jartzeko eskaera egin du behin eta berriz, baina erantzunik ez duela jaso salatu du.

Albiste hau Barren-ek argitaratu du eta CC-by-sa lizentziari esker ekarri dugu ARGIAra.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!


Eguneraketa berriak daude