Lerrook idazteko unean 7.389 lagunek sinatu dute Donostia Antitaurina erabiltzaileak sorturiko eskaera.

Kanpaina abian jarri dutenek, zezenketen kontrako mezua zabaltzearekin batera, gogora ekarri dute nola "donostiarren iritzia kontuan hartu gabe" eraiki zen Ilunbe zezen plaza.

"90eko hamarkadan milaka gipuzkoar kalera atera ziren Ilunbe zezen plaza ez eraikitzeko, 14.000 sinadura bildu ziren eta Europako herrialde askotako ehundaka elkartek gutunak bidali zizkioten Odon Elorza alkate ohiari zezen plaza geldiarazi zezan, berak erreferendum bat ospatuko zuela hitz eman zuen, baina ez zuen ezer ere egin", sinadura bilketa martxan jarri dutenen arabera.

Ilunbek eragindako galerak

"Hori gutxi balitz lizentziarik gabe egin ziren eraikitze lanak", dio eskaerak. "224 zuhaitz bota legez kanpo, Warnerri doan eman zitzaion zineetako gunea, Nuevo Desarrollo de Anoetari nahieran eta ilegalki adjudikatu zitzaion Ilunberen kudeaketa, beranduago EAEko Auzitegi Nagusiak ebatzi zuen bezala, eta kontratua amaitzearekin batera Donostiako Udalak 21 milioi euroko kalte-ordaina eman behar zion NDAri klausula batean jartzen zuen bezala. 30 milioi euro baino gehiago kostatu zaigu donostiarrei gutxi batzuk erabiltzen duten zezen plaza mantentzeak".

700 zezen hilda

Gainera, zezenketak hasi zirenetik utzi dituzten zenbait ondorio ere jarri dituzte mahai gainean: 700 zezen eta hainbat idisko hil dituzte Aste Nagusian eta beste zenbait jaietan.

Sinatzaileen ustez, "ez dago inongo arrazoirik gizakion antzera sufritu eta sentitzen duten animaliak erailtzeko, etikak etekin ekonomikoaren gainetik jokatu behar baitu".