46 urteren ondoren injustizia eta zigorgabetasuna direla nagusi salatu du Martxoak 3 elkarteak

  • Hainbat ekitaldi antolatu dituzte Gasteizen martxoaren 3ari begira. Besteak beste, Argentinako Kereilako ordezkaritzak parte hartuko du ekitaldietan. Martxoak 3 elkarteak salatu du 46 urteren ondoren injustizia eta zigorgabetasuna direla nagusi, eta hori hala izan ez dadin lanean jarraitzeko prest daudela adierazi du.

Argazkia: Martxoak 3 elkartea

2022ko martxoaren 02an - 10:47

Martxoaren 3an 46 urte beteko dira 1976an Espainiako Poliziak Gasteizen greban bildutako langileen aurka egin zuenetik, bost pertsona hilaz eta ehundik gora zaurituz. Astelehenean, urteurrenaren ataritan, agerraldia egin du Martxoak 3 elkarteak Gasteizen. Nerea Martinez Aranburuzabalak eta Andoni Txaskok hitz egin dute elkartearen izenean, eta salatu dute gertakarietatik 46 urte pasa diren honetan oraindik injustizia eta Espainiako Estatuaren zigorgabetasuna direla nagusi. Hala bada, justizia egin dadila lortzeko eta zigorgabetasunari amaiera emateko lanean jarraitzeko asmoa agertu dute.

Injustiziaren eta zigorgabetasunaren aurrean, ordea, elkartasuna egon dela seinalatu eta hori balioan jartzeko ere baliatu dute agerraldia. Adierazi dutenez, Gasteizko herritarren partetik ez ezik, kanpotik ere babesa jaso dute tarte honetan guztian. Horren adierazle, aurreratu dute aurtengo martxoaren 3ko ekitaldietan Argentinako Kereilako eta CEAQUA Argentinako Kereilari Laguntzeko Estatuko Koordinakundeko hainbat plataformetako ordezkariak izango dituztela ondoan. Besteak beste, Sartagudako, Iruñeko, Kataluniako, Asturiasko, Valentziako, Madrilgo zein Argentinako ordezkariak bilduko dira asteazkenean Gasteizen, helburu argiarekin: erakustea Gasteizkoa ez dela gertakari isolatua, baizik eta "estatu indarkeriaren errepresio eta zigorgabetasun estrategia sistematiko eta estruktural baten icebergaren punta".

Agerraldian bertan ere, Jacinto Lara Argentinako kereilaren abokatua izan dute ondoan. Araban ere, bertako instituzioekin batera, kereila bat abiatzeko lanean jarraituko dutela adierazi dute elkarteko kideek, martxoaren 3ko gertakariez gain frankismoaren eta trantsizioko krimenak ere barnebildu beharko lituzkena, berez ustez.

Larak, bere aldetik, Argentinako Kereilaren egungo egoeraz eta Martin Villaren auzipetzearen nondik norakoez hitz egin du. Bere arabera, "estatu indarkeriaren zigorgabetasunaren aurkako borrokan" inflexio puntua ezarri du kereilak, eragin baitu lehen aldiz biktimek martxan jartzea prozesu judizial bat martxoaren 3ko krimenengatik, eta ondorioz Rodolfo Martin Villa giza hilketa larrituengatik auzipetzea. "Espainiako bidegabekeriaren eta zigorgabetasunaren aurkako borrokaren hamarkada hauetan guztietan eman den pausorik garrantzitsuena", bere hitzetan.

Ekitaldietan parte hartzeko deia

Martxoaren 3arekin loturan egingo diren ekimenetan parte hartzeko deia luzatu du elkarteak.

Asteazkenean Zabalgana Euskara Taldeak antolatuta Gasteizko sarraskia eta Herri-M3moria hitzaldia egingo dute Zabalganako Gizarte Etxean, 19:00etatik aurrera.

Martxoaren 3an bertan, 12:30etan ekitaldia egingo du monolitoan EH Bilduk. Arratsaldeko 18:30etatik aurrera, monolitoaren inguruan baita, omenaldia egingo dute, eta ostean manifestazioa abiatuko da bertatik, ELA, LAB, Steilas eta Esk sindikatuek deituta. Ekimen bietan parte hartuko du Martxoak 3 elkarteak, eta arratsaldekoan CEAQUA Argentinako Kereilari Laguntzeko Estatuko Koordinakundeak ere bai.

Hitzordu horiez gain, martxoaren 6an Vitoria, 3 de marzo dokumentala ikusteko aukera egongo da Kanpezuko Kultu Etxean, 18:00etatik aurrera. Eta martxoaren 7a arte Luis Ziarrustaren martxoaren 3ko gertakarien argazki erakusketa ere ikusgai egongo da Zabalganako Gizarte Etxean.

Hala Bedik zehaztu duenez, aipatutakoak dira Martxoak 3 elkartearen parte hartzea izango duten hitzorduak, nahiz eta deialdi gehiago ere badiren. Batetik, martxoaren 3ko arratsaldeko manifestazioarekin bat egingo duen Gazte Blokea dago deituta, eta Hala Bedi tabernako kantoitik abiatuko da 18:00etan. Eta bestetik, Bloke Sozialista deitu dute Gasteizko Kontseilu Sozialistak eta GKSk, 17:45etan Rafa plazatik abiatuko dena, manifestazioarekin bat egiteko.

Azken horiek, Lekukoa hartu, sozialismoa eraiki lelopean, egitarau propioa ere osatu dute martxoaren 3ari begira, eta horren baitan ostegunean ekitaldia egingo dute martxoaren 3ko plazan, 13:00etan.

 

 

 

 


Kanal honetatik interesatuko zaizu: 1976ko martxoaren 3a
Erkoreka: Tolosako gaztea “istiluetan parte hartzen ari zen”, eta Gasteizko polizia “ondo infiltratuta zegoen”

Segurtasun sailburuak adierazpenak egin ditu astearteko gobernu bilera ostean. Xuhar 16 urteko gaztea bera egin du inauteritan jasotako lesio larrien erantzule, eta Ertzaintzak Martxoak 3ko manifestazioan poliziak infiltratu zituela onartu du, “polizia demokratiko”... [+]


2024-03-05 | Leire Artola Arin
Ertzaintzari erantzukizunak eskatu dizkiote eragile sozial eta politikoek, Martxoak 3ko erasoengatik

Asteazkenerako agerraldi masiboa deitu dute Gasteizko Martxoak 3 plazan, “errepresiorik gabeko Martxoak 3 herrikoiaren alde”. Aske antolakundeak astelehenean egin du protesta, eta atxilotuei elkartasuna adierazi die. EH Bilduk eta Elkarrekin Podemosek azalpenak... [+]


Ertzaintzak agente bat infiltratu zuen Martxoaren 3ko manifestazioan, baita lankideek jipoitu ere

Ertzaintzak bere agente bat infiltratu zuen Gasteizko Martxoaren 3ko manifestazioetan, Segurtasun Saileko iturri batek eldiario.es hedabideari baieztatu dionez. Lankideek beraiek jipoitu zuten manifestazioan izan ziren karga eta istiluetan.

 


Martxoaren 3a oroitu du jendetzak Gasteizen, eta Polizia manifestazioaren aurka oldartu da

Milaka herritar batu dira igande eguerdiko manifestazioan. Polizia manifestarien aurka oldartu da Bakea kalean, Corte Inglés parean, eta manifestazioa zatitu du. Bost lagun atxilotu ditu Ertzaintzak eta hainbat zauritu, tartean adineko emakume bat ahoan, foam jaurtigailu... [+]


“Orduko eta oraingo” borroka aldarrikatuko dute Martxoak 3ko sarraskiaren 48. urtemugan

Igandean egingo da manifestazio nagusia, ESK, LAB, ELA eta Steilas sindikatuek eta Martxoak 3 elkarteak deituta. Palestinari aipamen berezia egin diote lau sindikatuek. Egun berean zein aurrekoetan deialdi eta ekimen gehiago antolatu dituzte hainbat eragilek.


Eguneraketa berriak daude