Iñaki Arriola Ingurumen, Lurralde Plangintza eta Etxebizitza sailburuak eman du laguntzen berri, Eusko Jaurlaritzak asteazkenean egindako gobernu bileraren osteko agerraldian. Jakinarazi duenez, 15,5 milioi euroko aurrekontua bideratu dute koronabirusak azaleratu duen krisiaren ondorioz alokairua ordaintzeko zailtasunak dituzten alokairu libreko maizterrei laguntzeko.

Orain artean, bakarrik etxebizitza babestuetan bizi diren maizterrentzako laguntzak zituen onartuak Jaurlaritzak, alokairu libreko maizterrentzako laguntzak iragarriak bazituen ere. Aurkeztu berri diren laguntzak, Arriolak hitzetan, “koherenteak” dira etxebizitza babestuen eremuari begira aurkeztutako laguntzekiko. 250 euro artekoak eta sei hilabetez aplikagarriak izango dira, apiriletik irailera arte, baldin eta “zaurgarritasun-egoerak jarraitzen badu”.

Onuradun izan daitezke koronabirusa dela-eta langabezian egotera igaro diren edo aldi baterako enplegu erregulazioa ezarri dieten norbanakoak. Langile autonomoen edo enpresen kasuan ostera, diru-sarrerak edo salmentak %40 murriztu zaizkien horiek izan ahalko dira laguntzen onuradun.

Horiez gain, maizterrek beste zenbait baldintza ere bete behar dituzte laguntzak eskuratzeko: alokairu kontratua alarma egoera aurretik sinatutakoa izan beharko da, errentaren zenbatekoak une honetan maizterrak dituen diru-sarreren %30 gainditu beharko du, eta alokairuaren zenbatekoa ezingo da izan lurralde esparruko batez besteko errenta baino 1,5 aldiz handiagoa. Laguntza eskatzailearen familia unitateei dagokionez, honek azken urte fiskalean izandako diru-sarrerak 39.000 eurotik beherakoa beharko du izan eta ezingo du 50.000 euro baino gehiagoko ondarerik eduki.

Diru-sarrerak Bermatzeko Errenta (DSBE) edo bestelako laguntzak jasotzen dituzten norbanakoak kanpo uzten ditu laguntzak.

Eskaerak irailaren 30a artean eskatu ahalko dira, telematikoki, Eusko Jaurlaritzaren zein Alokabideren webguneen bitartez.

Laguntza urriak

Jaurlaritzak egindako kalkuluen arabera, 10.000 maizter inguru izango dira laguntza horien onuradun. Alabaina, kontuan hartuz gero EAEn gutxienez 144.273 langileri eragin dien lan erregulazioko 20.995 txosten aurkeztu direla, eta soilik otsailetik martxora bitartean 10.974 langabe gehiago erregistratu direla, pentsatzekoa da alokairua ordaintzeko zailtasunak dituzten pertsonak laguntzek barne hartu ditzaketenak baino gehiago direla.

Gainean den alokairu krisiari buruz Hordagok publiko egindako erreportajean argi mintzo da Kaleratzeak Stop Euskadi: laguntzak urriak dira. Etxe kaleratzeen aurkako plataformaren arabera, Jaurlaritzak etxebizitzara bideratzen duen laguntza beti da, gehienez ere, 250 eurokoa. Plataformak seinalatu duenez, laguntza horiek oso urriak dira Espainiako Gobernuak 2018an onartutako laguntzen aldean, horiek 300 eta 390 euro artekoak baitira eta egoera honetan 900 euro artekoak izatera heldu baitaitezke.

Gainera, aipatu erreportajean azpimarratzen denez, laguntzetara sarbidea izateko baldintza konplexuak exijitzen ditu Jaurlaritzak. Gasteizko Etxebizitza Sindikatuko kide Karla Berrojalbizen hitzak baldintzen hori berrestera datoz, momentuotan egiten ari diren lanaren ia gehiengoa laguntzak lortzeko aholkularitzara bideratua dagoela azaltzen baitu. Horren aurrean, beraiengana jotzen duten pertsonei azaltzen diete laguntzak eskatzeko bete beharreko bide burokratikoa “ulertu ez dezaten, bidearen azkenera heldu ez daitezen eta baldintzak bete ez ditzaten egina dagoela”.