Zer ematen dizue musika beltzaren eta punkaren arteko batuketak?

Zuriak gara eta nerabeak ginela pasioz hartu genuen punkaren eta rockaren errebeldia. Gerora, musika gehiago entzun, eta ulertu genuen guztia musika beltzetik datorrela. Gurea estiloak ondo irentsita egindako digestioa da; inola ere ez gara musika beltza egiten saiatzen den zurien taldea. Gure emaitza desberdina da eta interesgarriagoa.

Lehen musika taldeak egiten zituzten neskak erakartzeko; eta badira diotenak garrantzitsuena harremanak direla. Zuek ez dakit zein puntutan zaudeten, baina ia kantu guztiek neskez hitz egiten dute…

Bai, hala da, baina askotan aitzakia standard horren atzean beste gauza askotaz hitz egiten dugu. Kode antzeko bat da, folkean gai batzuk erabili ohi izan diren bezala.

World champions. Onenak zarete ala ez? Edo beste talde batzuekin alderatuta, bestelako helburuak dituzue?

Gurean onenak gara, beste inork ez duelako guk egiten duguna egiten gure erara. Momentuz munduko txapeldunak, eta gero etorriko dira beste helburu batzuk; are gehiago, oso gustura gaude diskoaren emaitzarekin.

Ez zarete berriak honetan. Zer ikasi duzue borroka urte hauetan guztietan, inoiz ahaztuko ez duzuena?

Ba, musikaren mundu honetan balio duena da ezagutu dezakezun jende interesgarria, eta horrek ahalbidetzen duen kultura eta giza trukatzea. Zoritxarrez, ezin dugu ahaztu aurrera egiteko gero eta horma lodiagoak jartzen dizkigutela. Baina, azkenean lehenengoak guztia konpentsatzen du.

Euskal Herriko taldeak serioegiak dira?

Euskal Herrian gauzak serioegi hartzen ditugu. Taldeek izugarrizko profesionaltasuna dute, eta badirudi batzuetan espontaneitate eta freskotasun apur bat galtzen dela. Baina salbuespenak ere badira: Euskal Herrian izaera handiko taldeak daude, serioagoak zein dibertigarriagoak izan.