Videla Argentinako diktadore ohiari 50 urteko kartzela zigorra ezarri diote
1967 eta 1983 arteko diktadura militarrean haurrak lapurtzea leporatuta, Jorge Rafael Videla Argentinako diktadore ohiari 50 urteko kartzela zigorra (fiskalak eta Maiatzeko Plazako amonek eskatzen zutena) ezarri diote. Videlak 86 urte ditu eta 1976tik 1981era bitartean izan zen Argentinako agintean.
Haurdun zeuden emakumeak kartzeletan edukitzen zituzten umea izan arte eta ondoren emakumea hil eta haurrak militarrei edo alderdikideei ematen zizkieten. 500 bat haurren kasua salatu dute Maiatzeko Plazako amonek.
Epaiketan Antoni Vañek eta Jorge 'El Tigre' Acosta Argentinako armadaburuak ere apaitu dituzte. Acostari 30 urteko kartzela zigorra eta Vañeki 40 urteko kartzela zigorra ezarri dio epaimahaiak.
Horiez gain, Reynaldo Bignone militar ohia ere kondenatu dute. 15 urteko kartzela zigorra ezarri dio epaimahaiak haur jaio berrien lapurretagatik.
Maiatzeko Plazako amonek duela hamazazpi urte salatu zituzten iloben lapurretak eta gaur "gustura" agertu dira epaiketaren emaitzarekin, "historikoa" izan dela esan dute. Bestalde, jakinarazi dute 500 ume lapurtu horietatik 105ek haien nortasuna berreskuratzea lortu dutela.
