Gorenak argitaratu berri duen epaian Etxebarria, Zapirain eta Sanchezi ezarritako zigorra bertan behera uzteko arrazoiak jaso ditu. Azaldu du, gainera, tortura salaketak ez ikertzeak justiziari “zilegitasuna” kentzen diola, Berriak argitaratu modura.

Zigorra bertan behera geratu da epaiketan ez zirelako aintzat hartu Zapirainek salatutako torturak. Sanchezek froga psikologiko bat egiteko eskatu zuen 2015ean izandako epaiketan. Auzitegi Nagusiak ez zuen aintzat hartu Sanchezen eskaria, beharrezkoa ez zela argudiatuz, lau urte pasa zirelako atxiloketatik. Alegia, ez zuen Istanbulgo Protokoloa aplikatu Zapirainen kasuan.

Joaquin Gimenez Goreneko 2. Aretoko epaileak Sanchezen helegitea aintzat hartu du orain. Izan ere, Zapirainen deklarazioa zen haren aurkako froga bakarra, 2011n egina, eta Zapirainek berak salatu zuen deklarazioa egin eta hilabetera torturapean eginikoa zela, inkomunikaturik egon zen bitartean. Froga “beharrezkoa” dela adierazi du orain Gorenak.

Lehenengoz Espainiako Estatuan Giza Eskubideen Europako Auzitegiak torturak ikertzeko beharraz dioena errespetatzea dakar epai honek.

2006ko urtarrilean Bilbon Enpleguko Institutu Nazionalaren (EIN) bulego bati erasotzeagatik zigortu zituzten Etxeberria, Zapirain eta Sanchez. Etxebarriaren kasuan Estrasburgok Espainiako Estatua zigortu zuen 2014ko urrian, hark eta Oihan Ataunek salatutako torturak ez ikertzeagatik. 29.000 euroko indemnizazioa jaso zuen orduan Etxebarriak.

Auzitegi Nazionaleko zigor-arloko aretoak ekainaren 14an hartu zuen epaiketa errepikatzeko erabakia eta orain argitaratu da Gorenaren epaia. Beste epaile batzuekin errepikatuko da epaiketa.

Espainiako Estatua zortzi aldiz salatua tortura ez ikertzeagatik

Auzitegi Gorenaren erabaki honek lehenengoz Espainiako Estatuak nazioarteko betebeharrak betetzea dakar. Alegia, tortura salaketak ikertu beharra.  

Espainiako Estatua zortzi aldiz salatu du Estrasburgoko Giza Eskubideen Auzitegiak, tortura salaketak ez ikertzeagatik. Hori ere nabarmendu du Gorenaren epaiak.

Zortzi salaketetatik zazpi Euskal Herriko herritarrei dagozkie. Azkena maiatzaren 31n izan zen, eta orduan Auzitegiak ondorioztatu zuen Espainiak ez zituela nahikoa ikertu Xabier Beortegik inkomunikazio egoeran Guardia Zibilaren eskutik jasandako tortura salaketak.