El País egunkari espainiarrak argitaratutako artikuluan dioenez, ez dago hartu-emanik EiTBko enpresa-batzordearen eta zuzendaritzaren artean, eta sindikatuek jakin nahi dute ea lan erreformarekin bat egingo duen zuzendaritzak. Hala balitz, "telebista gelditzeko prest" daudela diote. Oraingoz, mobilizazioak iragarri dituzte berriro ere, datorren ostegunerako.

Lan hitzarmena mantentzea bideragarria dela gogoratu dute enpresa-batzordetik: "Haien borondatearen menpe dago, hitzarmenaren aurreraeragina dagoeneko onartua izan baita beste euskal enpresa publiko batzuetan, Diputazioan, Metroan edo Euskotrenen kasu".

El Paísen arabera, lan gatazkak egoera labainkorrean utziko luke irrati telebista publikoak egun bizi duen une konplexua, audientzia asko jaitsi dela, defizitak etengabe gora egiten duela eta politika eta aurrekontu arrazoiengatik administrazio kontseilua zatituta dagoela argudiatuz.

ETB2n %8,8koa da audientzia eta ETB1en %2koa. Gainera, 6 milioi euroko defizita izan du urteko lehenengo seihilekoan. Enpresa-batzordearen hitzetan, "Andoni Ortuzarren etapako akatsak ordaintzen jarraitzen dugu, herrialde aberats baten telebista egin baitzen garai hartan".

Maite Iturbe, "elkarrizketaren alde"

Bestalde, El Diario Vasco egunkarian joan den astean egindako elkarrizketan, Maite Iturbe EiTBko zuzendari orokorrak esan zuenez, "ez gara ari lan erreforma aplikatzen, eta ez dugu aplikatuko. Ez da gure asmoa. Elkarrizketaren eta negoziazioaren alde gaude, eta sindikatuekin akordioa lortzen dugunean amaituko da. Hori da gure asmoa eta anbizioa".