Irrati jardunaldiak antolatu ditu Arrosa sareak larunbaterako Bergaran
Asteburu honetan Bergarako (Gipuzkoa) gaztetxean egingo dira Arrosa sareak antolatutako Euskal Herrian bada zer entzun. Irratiok elkarlanean jardunaldiak. Egun osoko egitaraua prestatu dute larunbaterako eta asteazkenera arte zabalik dago izena emateko epea ondorengo helbide elektronikoan: arrosa.sarea@gmail.com. Lehen aldia da Arrosak mota honetako jardunaldiak antolatu dituena.
Goizeko 10:00etan tailer praktikoek emango diete hasiera jardunaldiei. Tailerrak lau gunetan banatuko dituzte eta irratiarekin zerikusia duten hainbat gai landuko dituzte: irratsaio bat nola antolatu, zuzeneko irratsaioentzako baliabideak, programaziorako tresnak, estudioz kanpoko irratsaioak egiteko baliabideak, hizkuntzaren deontologia eta generoa, teknika, audio edizioa eta segurtasun informatikoa. Bazkaria baino lehen zuzeneko irratsaioa egingo dute eta bazkalostean Euskara eta komunikabideak mahai inguruan izango da 16:00etan. Horren ondoren, Radio Vallecas irratiko kideak Generoa eta komunikabideak gaiaren inguruan mintzatuko dira. Jardunaldiei bukaera emateko 22:00etan kontzertua izango da gaztetxean.
Arrosa sareak bere webgunean entzungai jarri du Hala Bedi irratian jardunaldien inguruan egindako elkarrizketa.
Ikasturtearen hasieran zibereraso bat jasan eta hainbat astez webgunea berreskuratzeko lanetan jardun ondoren, bueltan da Hala Bedi irratiaren web orria. Dagoeneko hasi dira ohiko edukia argitaratzen: Arabako aktualitate albisteak, magazinen edukiak, irratsaioen podcastak,... [+]
Hala Bedi Irratiak 40 urte bete dituela ospatu zuen abuztuaren 6an, lau hamarkada lehenago lehen irrati emisioa egin zuen egun berean.
Aurten, eguneroko Suelta la Olla, Hizpidea eta Arrosa sareak ekoitzitako Zebrabidea magazinez gain, 42 irratsaio propio izango dira entzungai Hala Bedi irratiaren uhinetan. Euskaraz 14 irratsaio egingo dira, 27 gaztelaniaz eta galizieraz bat.