Dignidad y Justicia, AVT eta herri akusazioaz:

“Beti galdetu izan dut: Egunkariak zer kalte egin die elkarte horiei? Biktimarik sortu al du? Izatekotan Egunkaria izan da gehiegikeria handi batzuen biktima. Berez, akusazio popularra figura progresista bat da, baina Auzitegi Nazionalean perbertitu egin da eta erabiltzen ari dira oso interes beltz eta konkretu batzuen alde, jarrera ultraeskuindarrak defendatzeko”.

Tortura eta guardia zibilek epaiketan esandakoaz:

“Sentimendu arraroak dira, ez da gozoa edo mikatza, arraroa baizik. Hainbeste urte pasa eta gero [guardia zibil] horietako bat edo bi ezagutzea... Baina ikusten duzu teatro horren guztiaren barruan berak bere papera jokatzen duela: gezurra esaten du”.

90eko hamarkadan ETAri atzemandako dokumentuez:

“Horietan oinarritzen dira. Baina paper horiek fiskalak oso ondo aztertu ditu eta garbi esan du ez dutela ezer frogatzen. Jakina, hori da etxe horrek [Auzitegi Nazionalak] duena eta aurreko esperientziek erakusten dutena: ikusten badute horrelako helduleku bat behar dela, horretan oinarrituko dira eta punto”.

Gabonetako geldialdiaren ostean gaur hasiko da hirugarren egunez Egunkariako auzipetuen kontrako ahozko epaiketa. Orain artekoan auzipetuek eta hainbat guardia zibilek deklaratu dute –lekuko bezala–, eta gaur ETAn ibilitako hainbat presoren testigantza entzutea espero da. Lekuko horiek Dignidad y Justicia eta AVT elkarteek deitu dituzte deklaratzera, 90etan atzemandako paper ezagun batzuen inguruan galdetzeko. Epaimahaiak 40 lekuko baino gehiago onartu dizkio akusazioari –gehienak guardia zibilak– eta soilik 16 auzipetuen defentsei, nahiz eta hauek 70 lekuko galdekatzea eskatu zuten.

Epaiketaren bigarren egunean guardia zibil batek onartu zuen eurek eskatu ziotela Del Olmo-ri Egunkaria ixteko, eta hortik ondoriozta daiteke epaileari zegokion esparruan sartu zirela. Bestalde, adierazgarria da Auzitegi Nazionaleko Fiskalaren jarrera, galderarik ez egitea erabaki baitu. Fiskaltzak, frogarik ez dagoela-eta, auzia artxibatzeko eskatu du, eta hain zuzen hori izango da epaiketaren giltzarrietako bat.

Bestalde, gaur Público egunkariak iritzi artikulua plazaratu du Joan Mari Torrealdaik idatzia; honakoa dio Egunkariako auzipetuak: “Txikitan ikasi genuen kristau dotrinan, Jainkoa, aurrez existitzen zen printzipio unibertsala zela. Egunkariako sumarioan, aurrez existitzen den printzipio unibertsala ETA da. Bati, lan unibertsitarioetan urte asko jardun denean, gorritasuna sortzen dio polizia ikerketetako txostenen zehaztasun faltak. Hipotesia tesiak ordezkatzen du”.

Epaiketa goizeko 10:00etan hasi da eta Berria.info zuzeneko jarraipena egiten ari da Twitter bidez. Horrez gain, Egunkarialibre.info webgunean #egunkaria etiketa duten mezuak biltzen ari dira.