Bi arrazoi zituen Nagore Uriarte aurkezleak IDEMtitateak gisako programa bat proposatzeko: elkarrizketak egiterakoan sumatzen zuen emakumeen falta eta berdintasunarekin lotutako saio bat egiteko gogoa. Telebistan emakumeen hutsuneaz aritzean ez du kazetarion erantzukizuna ezkutatzen: “Beharbada guk ere erreferentzialtasun falta dugu eta gizon gehiago ikusten ditugu, beraien ikerketak, lanak… Beti jotzen dugu eurengana adituak behar ditugunean”. Emakume adituak topatzean ezezkoa ere esan diote: “Erantzuten zidaten eurak ez zirela adituak, nahiz eta tesiak eta artikuluak zituzten idatzita gaiaz. Konfiantza falta nabaritzen nuen”.

IDEMtitateak saioan jarri ditu emakumeak hizketan, hainbat gizon ere bai, emakumea eta kartzelaz, etxeko langileen errealitateaz eta genero rolez gaztetxe eta gune autogestionatuetan, besteak beste. “Indartu nahi izan den ideia da, gonbidatuek ere askotan errepikatzen zutena, ez direla emakumeak euren gaiez hizketan, baizik eta emakumeak denonak diren gaiez hitz egiten”.

Epaimahaiaren arrazoiak:

Azkenaldian ikusi dugun telebista-saio politiko interesgarriena da. Eta politikoa diogunean, noski mundua antolatzen den moduaz ari gara. Beste zenbait erabaki bezala, inori galdetu gabe agindu zuen norbaitek ez ginela berdinak, diferentea zela gizon ala emakume izatea, ezin genituela eskubide berdinak izan eta pantaila-kuota desberdina zegokigula.

Zehazki: emakumeak gutxiago agertzea zela jarraitu beharreko araua. Inon idatzita ez dagoen arren, zorrotz betetzen den legea hautsi du sarituko dugun programak, eta ez nolanahi.

Genero gaiekin lotutako eduki interesgarriak plazaratzen ari da astez aste formatu erakargarrian, gai sakonenak ere edonork ulertzeko moduan ekarriz. Gizon eta emakumeen arteko berdintasunaren alde egindako ekarpenarengatik 2015eko ikus-entzunezkoetarako Argia Saria Hamaika Telebistako IDEMtitateak programarentzat da.