Horrela kontatu du Haizea Nuñez Gipuzkoa Zutikeko abokatuak, kide bati orain isuna jartzeko ertzaintzak oinarritzat hartu duen egoera: "Asanblada egiten ari ziren, Gipuzkoa Plazan. Kideetako bati eskatu zion ertzaintzak identifikatzeko. Honek hasieran  ez zuen bere identifikaziorik atera. Identifikazioa ateratzean ertzainak gainera etorri zitzaizkion eta arkupeetara eraman zuten. Bitartean, gertakizun hura grabatzen ari zen ARGIAko kazetari Gorka Bereziartuarengana jo zuten beste ertzain batzuek eta mugikorra kentzen saiatu ziren. Gipuzkoa Zutikeko beste kide bat (isuna jaso duena) ertzainen eta kazetariaren artean jarri zen, bestea kazetaria zela esanaz behin eta berriz ertzainei. Orain isuna jaso duen kide horrek, momentu horretan ertzainen kolpeak jaso zituen eta Gorka Bereziartua kazetariaren ondoan egon zen, ertzainek kazetaria arkupeetara eraman arte. Gipuzkoa Zutikeko kide honek bera kolpatu zuen ertzainari identifikazio zenbaki profesionala eskatu zion. Ertzainak ez zion eman, baina Gipuzkoa Zutikeko kide honek ikusi egin zion eta gogoan hartu. Kide hau oinez joan zen sorosle etxeraino, gel batzuen bila plazan dagoen taberna batetik pasa ondoren. Inongo momentutan ez zion ertzaintzak identifikatzeko eskatu".

Identifikatu ez bazuten, nolatan isuna?

Bai isuna jaso berri duen kide honek eta bai Bereziartua kazetariak, kolpatu zituen ertzainaren aurkako salaketa jarri zuten, biharamunean, Donostiako Goardiako Epaitegian. Ertzainen kontrako Zigor arloko prozedura martxan dagoela azaldu du Nuñezek: "Ikerketa fasean dago, instrukzioa ez da amaitu. Ertzain honek adierazpen judiziala egin zuen eta onartu zuen baietz, bera zela identifikazio zenbaki hura zuena eta irudietan agertzen zena. Baita ere onartu zuen bere “defentsa” (porra) erabili zuela 'bere burua babesteko'".

Orain, prozedura penala martxan jarri duen Gipuzkoa Zutikeko kide honi iritsi zaio isuna, Nuñez abokatuaren hitzetan "kasualitatez, bere garaian identifikatu ez bazuten ere. Ertzaintzak isun horretan dio kide honek eraso egin ziola ertzaintzari, ostikoak jo zizkiela eta ihes egin zuela. Gogoratu behar dugu inork ez ziola identifikatzeko eskatu, eta oinez joan zela sorosle etxera plazan bertan dagoen taberna batetik pasa ostean. Inongo momentutan ez zuen egin 'ihes' edo korrika, isunaren ebazpenean esaten duten bezala". Isuna ekarri duen espedientea noiz zabaldu zioten jakitea da gakoa, benetan egun hartako ekintzei erantzuten dien jakiteko edo kide honek ertzainaren kontra abiarazitako prozedura penalari erantzun moduan bidalitakoa den ondorioztatzeko. Izan ere, urtebeteko epea du poliziak oraingo Mozal Legearekin, ekintzak gertatu eta haien ondorioz isunak jartzeko.

"Motibazio politikoa" isunaren kopuruan (900 euro)

900 eurokoa da Eusko Jaurlaritzako Segurtasun Sailak (Segurtasun Koordinazio Zuzendaria da ebazpenaren arduraduna) kideari jarritako isuna. Nuñezek azaldu duenez, "Mozal Legearen 36.6 artikulua (erresistentzia, desobedientzia edo ez identifikatzea) urratzea da zigortu dutena. Baina horren aurrean gutxieneko isuna 602 eurokoa da eta isunek proportzionalak izan behar dute. Ez dute argudiatzen isuna 900 eurokoa izateko oinarri nahikorik". Nuñezek azalpen bikoitza ikusten dio isun honi: "Lehenbizi ikusten dut martxan dagoen Zigor arloko prozedurarako ertzainen defentsa estrategiaren parte dela, baina isunaren zenbatekoa ikusita, motibazio politikoa ere ikusten dut. Dirua biltzea eta desmobilizazioa, gizartea erretzea bilatzen dute. Lan handia eskatzen du isunei aurre egiteak, eta lan horretan ematen dugun denbora benetan garrantzitsua denari kentzen diogu, alegia, erraustegi proiektua eta inposatu nahi diguten bizi eredua borrokatzeari".

Epaiketaraino joateko prest

Gipuzkoa Zutikeko abokatuak iragarri du "bide administratibo osoa" egingo dutela, eta hau agortzen bada, "epailearen aurrera joateko asmoa" dutela: "Denean defendatuko dugu erasoa ertzainak egin zuela".

9.000 euro isunetan.  Zorraren Festan elkartasuna

Nuñezek aitortu du ez dagoela zehatz jakiterik orain arte ertzainek identifikatu dituzten kideek isunik jasoko duten, eta zenbatekoa izango den bakoitza. Baina Gipuzkoa Zutikek, bada ezpada, 9.000 euroko poltsa komuna biltzeari ekin dio. Ekarpena egiteko modu bat izango da larunbatean Hernanin egingo duten "Erraustegiaren Zorraren Festa"n parte hartzea.