Madrilgo Gobernuaren Delegazioak debekatu egin du Egunkariaren aldeko Madrileko plataformak biharko deitua zuen manifestazioa. Delegazioaren esanetan Auzitegi Nazionaleko Juan del Olmo epaileak Egunkaria itxi zuen “proiektu terrorista” baten parte zela zantzuak ikusi zituelako. Plataformak adierazi du helegitea jarriko duela debekuaren aurka, Gobernu ordezkariak errugabetasun presuntzioa urratu duelako.

Atzo Iñaki Uriak eta Xabier Arzallusek hitzaldia eskaini zuten Bilbon; Arzallusek “bidegabekeria” gisa aurkeztu zuen auzia baina aldi berean kritiko azaldu zen: “Egiten ari diren guztiak eginda ere, ez dugu erreakzionatzen” esan zuen.

Sustatu.com-en berriz, Imanol Murua kazetariak auziaren inguruko galdera-erantzun sorta publikatu du azken egunotan eta gaurko artikuluan azaltzen duenez herri akusazioa osatzen duten taldeek hasierako tesiari eutsi diote akusazio idatzietan, esanez Egunkaria ETAk sortu zuela: “ETAren zerbitzuko tresna zela, ETAren finantza sareko enpresa zela, Egunkariako arduradunak ETAren konfiantzakoak zirela, zuzendariak zuzenean ETAk izendatu zituela eta, beraz, sumario nagusiko bost auzipetuak ETAko kide direla”.

Bestalde, hainbat iritzi artikulu argitaratu dira gaur:

- Joan Mari Larrarte EKTko kontseilari ordezkariak Berrian: “Une honetan [2003an Egunkaria ixtean] konturatu zen euskaltzale asko euskalgintzaren balio eta indarraz, eta, era berean, estatuarena urrean zuen ahuleziaz. Orduan ikus izuen askok euskaraz zuen pisua eta garrantzia Euskal Herriarentzat eta horixe zela, eta ez besterik, Egunkaria ixteko arrazoia (...) Guztiok ulertu genuen gure herri izaeraren muinera jo zutela”

- Luis Bilbao Larrondo historialariak Diario de Noticiasen: “Lotsatuta sentitzeko modukoa da, ez bakarrik ekintzarekin [epaiketarekin], baita gainerako komunikabideen laguntza ezarekin ere; hedabide guztiek egin beharko lukete bat haien lankideak defendatzen”.