Atzoko sesioan lekuko gisa hartu zuten parte guardia zibilek, baina urtarrilean berriz ere itzuliko dira sala horretara, peritu gisa deklaratzeko. Gomez Bermudez epaimahaiburuak “embrollo” hitza erabili zuen egoera hori definitzeko. Harrigarria da epaimahaiak onartzea guardia zibil horien peritajea, ikusirik instrukzio guztian izan duten jarrera partziala. Bestalde, auzipetuek jasandako torturen inguruan galdetu zieten guardia zibilei defentsa abokatuek –fiskaltzak ez zien galderarik egin– eta hauek ukatu egin zuten halakorik izan zenik: “estropezu egin eta orkatila bihurritu zuela esan zidaten” esan zuen guardia zibilak atzokoan, Iñaki Uria bertan zela.

Euskal Herriko prentsan iritzi eta editorialak ugari izan dira epaiketaren lehenengo bi egunetan. Madrilgo prentsa, berriz, guardia zibilek esandakoak kontatzera mugatu da kasik (El País, El Mundo, La Razón), eta batzuetan izenburu iraingarriak erabiliz: Los reos de “Egunkaria” recurren, como ETA, a denunciar torturas (ABC).

Bestalde, epaiketak oihartzun ikusgarria izan du sarean informazioa eta auzipetuei babesa emateko. Twitterren bidez jarraitu ahal izan da auzia eta Facebook-en elkartasuna adierazi dute. Egunkarialibre.info atarian sarean dabilen informazio guztia bildu nahi dute epaiketari jarraipena egiteko. Paul Riosek bere blogean ere jarraipena egin dio epaiketari eta Javier Ortizek aspaldi darama auziaren ingurukoak biltzen bere Pedradas blogean.

Zenbait iritzi artikulu argitaratu dira gaurkoan hedabideetan:

- El juicio que nunca debía haber comenzado (Pello Salaburu, El Correo)

- Aminetu Haidar bihotzean eta “Egunkaria libre!” aldarria eztarrian (Joxe Iriarte Bikila, Noticias de Gipuzkoa).

- La condena a Egunkaria (Ignacio Escolar, Público).

Epaiketak urtarrilaren 11n jarraituko du. Fiskalaren eta epaimahaiaren jarrerak baikortasunerako bide ematen du, baina auzipetuak kezkatuta jarraitzen dutela azaldu dute, herri akusazioek haien tesiei eusten dietelako. Horregatik, etzi Bilbon egingo den manifestaziora joateko deia egin dute beste behin ere.