Batak zein besteak oinarrizko kapital maila ona dute: arriskuan egon daitezkeen aktiboen %13,44 Ipar Kutxak eta %10,42 Bankoak, Espainiako Bankuan exijitzen duen %8tik oso goiti. Bien artean 5.300 milioi euro aktiboko bankua sortuko zatekeen. Crédit Agricole 1997an egin zen Bankoaren akziodun nagusi eta bere esanetan “azken asteotan larriagotu den” finantza krisiaren ondorioz eten du bat egitea. Bankoa eta Ipar Kutxako arduradunek azaldu dute etorkizunean aukerarik balego bat egite proiektu berri bati ekingo diotela.

Crédit Agricoleren erabakia Greziako krisiarekin lotu dute zenbaitek, banku frantziarrak ia 1.000 milioi euroko zorra erosi baitzion herrialde heleniarrari. Duela gutxi Moddy’s agentziak Crédit Agricoleren eta Société Généraleren kalifikazioa jaitsi zuen, hain zuzen Greziako zorrarengatik duten arriskuarengatik.

Dena den, Frantziako bankuek Grezian galtzeko izan dezaketena askoz gehiago da, orotara 40.000 milioi euroko zorraren jabe baitira bertako entitateak. Hain zuzen, atzo jo zuen hondoa Dexia banku frantziar-belgiarrak eta euroguneko krisiak hondoratutako lehena bilakatu zen. Dexiak 3.462 milioi euro ditu jokoan Grezian eta arrisku horren zurrumurruengatik burtsan %32,6ko galera izan du azken bi egunetan. Frantziako eta Belgikako gobernuak Dexia erreskatatzeko aukera aztertzen ari dira. 2008an AEBetako subprime hipoteken eztandagatik erreskatatu zuten Dexia eta 6.376 milioi euro jarri behar izan zituzten erakunde publikoek.