Emakumeak borrokan

Fresko eta arina

Montserrat Auzmendi del Solar
2019ko apirilaren 07a
Pianissimo saioa. Euskadiko Orkestra Sinfonikoa. Musika Gela zikloaren Barruan. Gasteizko Principal Antzokia. Martxoaren 22a.

Aspalditik badabil Euskadiko Orkestra Sinfonikoa saiakerak egiten herritarrei, oro har, eta gazteei, bereziki, musika klasikoa gerturatzeko. Asmo honekin ziklo berezi bat du orkestrak, Musika Gela izenekoa hain zuzen ere. Gaztetxoei zuzendutako ziklo honetan saio labur eta didaktikoak aurkitzen ditugu, eta bakoitzean musikaren arlo berezi bat eta ikuspuntu konkretu bat lantzen da.

Aldi honetan, nahiz eta egitarau interesgarria ekarri Euskadiko Orkestrak, jende gutxi ikusi genuen Principal Antzokian. Pena. Pianissimo izenburuarekin, emakume-ahots inpostatuaren nolakotasunak arakatzea proposatu digu Orkestrak, eta ahotsaren analisiaren bitartez musikaren ñabarduretan eta hauen terminologia espezifikoan sakondu da errezitaldi honetan. Eta hau guztia ordu betean.

Belliniren Norma operaren oberturarekin hasi zen kontzertua. Asier Puga zuzendari gazteak jakin zuen txispa ateratzen orkestratik. Maisutasunez menderatu zituen lan honek dituen ñabardurak, eta emaitza koloretsua lortu zuen. Jarraian, Mikel Laboaren obra bitxi bat entzun genuen. Gernika pieza honek (Ramon Lazkanok orkestratua) badu Laboaren munduaren kutsua, erdi inpresionista, erdi ameslaria. Agian orkestrazio distiratsuago batekin bestelako erakargarritasuna izango luke, baina atsegina suertatu zen interpretazioa.

Belliniren La Sonnambula-ren aria eta cabaletta Helena Orcoyen sopranoaren lehen pieza izan zen saio honetan. Aukera izan zuen abeslariak publiko gazteari erakusteko aria batean aurkitzen diren mila zailtasun eta deabrukeriak, eta zein abilezia eduki behar den hauek salbatzeko. Teknika ondo ikasia du soprano honek, agian zertxobait forzatua une batzuetan, baina eraginkorra dudarik gabe. Bestalde, teknikatik aparte, adierazkortasuna ere erakutsi zuen Helena Orcoyenek, dramatismo izugarria azaldu baitzuen Donizetti-ren Lucia di Lammemoor operaren eroaldiaren eszenan.

Errezitaldiaren gidaria Ana Eguiazabal izan zen. Txukun bete zuen bere papera, Mikel Cañadaren gidoi eskasak jarraituz. Hau izan zen agian alderdi ahulena. Gidoiek ez zuten gehiegi aportatzen eta ez dakit egokiak ziren han zegoen publikoarentzat. Bestela, ondo.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal honetan artxibatua: Kontzertuak

Kontzertuak kanaletik interesatuko zaizu...
ASTEKARIA
Azkenak
EGILEA
Eguneraketa berriak daude