Alabastroak urrea balio du euskal komunikazioan
Gure jauregian txanpon ugari ez duzu aurkituko, baina bai urrea balio duten alabastrozko sariak. Gure jauregia txikia da, baina ez du dar-dar egiten trumoiak jotzen duenean. Gurean, kanpoan hotza denean, epeltasuna dakar barruko suak. Ogi goxoa jango duzu gure jauregian, Antton Mendizabal eskultoreak labetik atera berria.
Atxega jauregian izan da aurten Argia Sarien ospakizuna, Usurbilen. Ohikoa den bezala, bazkal aurreko lunch txikian mingaina dantzatzeko aukera izan zuen nahi zuenak; ondoren, mahai borobil dotoreetan eseri, eta otordu goxoaz gozatu zuten gonbidatu guztiek. Denetariko berriketaldiak izan ziren: Tabakoaren Legea, aurreko eguneko greba, egoera politikoa, lehendakariak euskarari buruz esandakoak...
Postre eta kafearen bueltan, Olatz Korta Argiako kideak hasiera eman zion sari banaketari. Ordurako, argazkilariak, irrati esatariak, telebista kamerak, denak prest ziren sekretua bizkor aireratzeko. Aurretik ordea, Xabier Letona zuzendariak euskal hedabide ez publikoek jasaten duten egoeraren analisi zorrotza egin zuen (hitzaldia 41. orrialdean), eta egoera horri elkarrekin erantzungo zutela iragarri. Irakurleak Argiaren zenbaki honen hasieran aurkituko du hedabideok modu bateratuan argitaratutako editoriala, gure iritzia adieraziz.
Eta ondoren, hurrenez hurren, sariak banatu zituzten Argiako lankideek. Ahotsak.com-eko Asier Sarasuak eskerrak eman zizkien erakundeei proiektua finantzatzeagatik, baina batez ere euren ahozko lekukotasuna eskaini duten “3.014 hizlariei, proiektua guztiona delako”. Gaztezulo aldizkariak esan zuen saria garrantzitsua dela aurrera begirako lanean “hauspoa” izango delako: “Iaz hamar urte bete zituen gure aldizkariak, ez zen urte erraza izan, ez gara engainatuko: zailtasun ekonomikoak izan genituen, murrizketak tarteko. Baina nolabait lortu dugu gure helburuak betetzea eta sari honek hamar urteko zikloa borobiltzen du” esan zuen Igone Fernandezek. Nik ere euskaraz publizitate kanpainarengatik jaso du Donostiako Udalak Argia Saria. Bertako ordezkari Ainhoa Beolak eskerrak eman zizkien ekimenean parte hartu duten 14.000 laguni: “Oraindik batzuei gogorarazi behar zaie, 14.000 ez, askoz gehiago garela euskaraz bizi nahi dugunak”. Orain telebista saioko Natxo Escobarrek azaldu zuen txarrak direla hizketan eta horregatik “irudia jarri nahi genion ondo hitz egiten duen jendeari, zerbait esateko duenari”, hori da saioaren funtsa. Bukatzeko, Fermin Etxegoienek, Ekaitz Perfektua irratsaioko gidariak, Gaztea-ko zuzendariak eskertu zituen batez ere: “Irrati komertzialean formula honetan sinetsi dutelako. Ekaitz Perfektua hori baita, musika guztiak batera ordubetean”.
Hala, Aitor Furundarenaren soinuak agurtu zituen 2011ko Argia Sariak, euskal komunikazioaren altxor txikia.
Oso gomendagarria den Autopsiarako frogak, Koldo Izagirreren liburutik hartutako pasartea da, eta aste honetan bertan euskararen gainean izandako adierazpen eta ika-mikaren harira ekarri dut hona.
Adierazpenen egileak, jakin badaki ez luketela txarto interpretatuko esandakoetako batzuk esan ez balitu. Esandakoak, gainera, ez dira berriak eta 2008an Eusko Legebiltzarreko hauteskundeetarako egin zen Euskara Askatasunez manifestuan inspiratzen dira.
Baina uste dut garrantzitsuena ez dela Patxi Lopez lehendakariak euskara eta askatasunari buruz esandakoa. Esan zuen baita ere bortizkeriaren amaierak bide berriak urratuko zituela eta horrek gauzak asko erraztuko dizkiola euskarari. Uste dut puntu hori dela garrantzitsuena, hor zentratu behar dugula guztiok eta, gainera, hor adostasun handia dagoela.
Gauza asko erraztuko dizkio euskarari eta baita ere euskal gizarteari oro har. Denok dakigu hori. Horrexegatik bultzatu behar dugu indar handiz euskal gizartean sortu den egoera berria. Lortu behar dugu hiltzea iraganeko kontua izatea, eta tortura, eta mehatxua, eta beste hainbat bortizkeria. Lortu behar dugu bake prozesu sendoa bideratzea. Lortu behar dugu berradiskidetze bideak irekitzea, horrek dituen ondorio guztiekin.
Eta hori guztia egin behar dugu krisi ekonomiko sakon bat kudeatzen dugun bitartean. Beste sektore batzuk bezala, euskarazko hedabide ez publikoen sektorea ere gogor astintzen ari den krisia da. Sinetsidazue, gure medio asko egoera oso estua igarotzen ari dira. Baina nola ez da hala izango ba erraldoiak ere ixten ari badira: 2010rekin bat itzali zen CNN+ Espainian, eta oraintsu jakin da Prisak, El País egunkaria egiten duen enpresak, 2.500 langile kaleratuko dituela. Nola demontre ez ditugu guk gorriak biziko?
Horrexegatik, euskarazko hedabide ez publikoek instituzioen sostengu handiagoa eskatuko dugu elkarrekin. Batu egin gara aldarrikapen hori egiteko, eta datorren astean entzungo duzue gure ahotsa modu bateratuan. Eta gizarteko beste sektore batzuk bezala, bagatoz aldarrikatzera gureak ere merezi duela konfidantza eta sostengu handiagoa. Hori funtsezkoa dela guretzat, baina baita euskararentzat eta euskal kulturarentzat ere.
Gauza asko egiten ari gara, prentsan, irratian, telebistan, Interneten… bitarteko gutxirekin gauza ugari egiten ari gara. Bitarteko apur bat gehiagorekin askoz gehiago egingo genuke.
Badakit instituzioei beti iruditzen zaiela nahikoa sostengu ematen zaigula, eta gainera batzuek pentsatuko dute: “Begira hauek, beti eskean!”. Ez da orain zenbaki dantzan hasteko unea, baina gure erakundeetako aurrekontuak aztertuz gero eta konparaketak eginez gero, edozein euskaltzale zintzok ikus dezake gauza “inportante” batzuetan zenbat gastatzen den eta beste “inportante” batzuetan zenbat.
Klabea ez dago instituzioetan, gure sektorean dago, gure medioetan… baina une honetan instituzioen sostengu handiagoa ere giltzarri da. Argiakook pozik gaude ekimen bateratu honetan hedabide asko elkartu garelako eta elkarlan horretan gure alea jartzen jarraituko dugu.
Gauza onak lortzeko inoiz ez da beranduegi. Inoiz ez da beranduegi bakea lortzeko, ezta berradiskidetzeko ere… ez instituzio eta euskarazko hedabideen arteko elkarlana areagotzeko… Edo, adibidez, inoiz ez da beranduegi pentsio justuen alde borrokatzeko… Eta, jakina, inoiz ez da beranduegi Argiaren Interneteko albistegi berria ikusteko. Gure ibilbidean hau beste urrats bat da, sartu argia.eus-era ikusi Beranduegi eta emaiguzue zuen iritzia.
Argia Sariak banatu aurretik emandako hitzaldiaren pasarteak dira honakoak.
Negozioak eta interesak zapaltzaileen buruetan. Izan herri bat zapaltzeko, hizkuntza bat, kultura bat, memoria edo ingurumena. Dirua, sosa. Egoerarik makurrenetan ere, ordea, usu pizten da erresistentziaren su txikia, interesen gainetik duin bizi nahi duen jendearen mugimendua... [+]